NLUP kalpui danah manual zawm lo ; State budget aṭanga sem a ni - CAG
Comptroller and Auditor General (CAG) report chuan, NLUP hnuaia thil kalpui danah NLUP Manual-in a phût anga tih loh a awm thu leh, NLUP chu state budget aṭanga sem a nih thu an tarlang. CAG hian kum 2011-12 - 2015-16 chhunga NLUP kalpui dan an zir chiang a ni.
NLUP Manual-ah chuan, khaw pum tana ram hman tur buatsaih tur a nih thu te, mimal ram, forest area leh vantlang ram ṭhen hran tur a nih thu te, thlai chînna ram tur chhinchhiah lâwk tur a nih thute leh, khaw tana project, action plan leh implementation plan, etc. siam lâwk tur a nih thute tarlan a ni. Hengte hi Village Level NLUP Committee (VLNC) tih tura dah a ni a, VLNC-te chu NLUP dawng tur thlan leh an ram tur pekah thuneihna pek an ni bawk.
CAG chuan, khaw pum tana ram hman tur buatsaih a nih loh thu te, mimal ram, forest area leh vantlang ram ṭhen hran a nih loh thute leh, thlai chînna tur bik thlan hmaa line department-in NLUP dawng tura thlante hnenah pawisa an pek thute report-ah an tarlang.
CAG report tarlan danin, NLUP atan hian sorkar laipuiin state budget kaltlangin sum a pe chhuak. Sorkar laipuiin sum chu state Finance department-ah a pe a, anni hian line department-te hnenah an pe chhuak ve leh a; line department-te chuan district level body-ah pe ve lehin, chumi hnuah khaw malah a lut leh a ni.
Sorkar laipui chuan October 2010 leh September 2014 khan additional central assistance hnuaiah cheng vbc. 1526.14 a rawn pe a, kum 2015-16 ah pek a nei lo. Sum pek tawhte chu hman tawh angin tarlan a ni a, mahse, hman zawh vek tak tak a ni lo. Sum hman lohte chu lak chhuah niin, civil deposit (K-deposit) anga dah a ni.
NLUP atan hian trade/activity hrang hrangah kum 2010-ah Calendar of Works buatsaih a ni a, kum 2011-ah ennawn a ni. Calendar of Works ang chuan, NLUP first instalment-ah Industries department tih lohah chuan Rs. 20,000 ṭheuha sem tur a ni a; chutih laiin, September-October 2013 chhungin NLUP chu first instalment-ah Rs. 10,000-a sem tura tih leh a ni. Hei vang hian cheng vbc. 205.84 chu civil deposit (K-deposit)-ah a awm.