Mizo hnamah kan innghat tur a ni - Zoramthanga

MNF president Zo­ram­thanga chuan, Mizo­te chu hnam dangah an innghat tur a ni lo tih sawiin, "Mizote chu Mizo hnamah chauh kan innghat tur a ni," a ti.

Aizawl North-II MNF Block-in nimina Ramhlun Indoor Stadium-a confe­rence an hmannaah thu sawiin Zoramthanga chuan, "Mizote chuan Mizo nationalism hi kan ṭobul tur a ni a, hnam danga innghat tur kan ni lo a, hnam dang party rinchhan turin Mizote hi Pathianin min siam lo," a ti a; hnam dang party leh policy-a innghah chuan vai party organisation zawm a ngai a, inchei dan leh khawsak phung tinreng leh Kristian zia nen a inmil lo niin a sawi.

Mahni hnam party-a inghah loh chu a tlo lo a, rei a daih ngai lo nia sawiin Zorama chuan, "MNF hi Delhi lamah vawi khat pawh kan la sorkar lo, mahse, hnam thuthlung vuantute kan nih avangin Mizo hnam chawi nung zel turin vawiin thlengin kan la phûr em em a ni," a ti.

MNF President chuan, Mizote chu Pathianin khaw­chhak aṭangin a hruai chhuak a, Burma ram phaizawl ṭhate kal kânin, Mizoramah a hnutchhiah tih sawiin, "Ṭawng khat hmang, sakhaw khat bia, ram rálmuang, lehkhathiam tamna ram, Pathian Thlarau Thianghlimin a tlawh zin ber kan ni. Pathian leh mipui zarah nakum inthlanah kan sorkar ang a, SEDP hmangin ram hmasawnna kan thlentir dawn a ni," a ti bawk.

Inkhawmah hian Ai­zawl North-II chhunga poli­tical party hrang hrang leh neutral mi voter 172 chu Zoramthanga'n MNF-ah a lawm lut niin MNF thuchhuah chuan a tarlang.