MZU zirlaite’n FCI Kudam chhehvela Truck parking chinfel hna thawh an tum

Mizoram University Students’ Council (MZUSC) chuan, Tanhrila FCI kudam chhehvela truck dingin MZU-a kal ṭhinte leh a bul vela cheng mipuite harsatna a la thlen reng avangin, MZU zirlaite’n a chinfel hna thawh an tum tih an puang.

MZUSC hruaitute chuan nimin khan Mizoram Truck Owners Association (MTOA) leh Traffic SP an hmu a, Tanhrila FCI kudam chhehvela truck dingin MZU zirlaite leh hnathawkte a tihbuai dan an sawipui.

MZUSC chuan thuchhuah siamin, FCI kudam chhehvel­ah truck-te awmze nei loa hûn a ni ṭhin chu an ngaimawh hle tih sawiin, “Vawi tam tak thuneitute hnenah kan thlen tawh,” an ti a; MZU Joint Action Committee leh Mizoram sorkar nen pawh September 15, 2016 khan Transport minister John Rotluangliana pisaah Transport Secretary, FCI area manager leh FCI official dangte hriatpuina leh hmuh laiin inremna an siam tawh tih an sawi.

Inremna an siam chuan awmzia a nei lo nia sawiin MZUSC chuan, “Kawng sira truck parking a mumal lo hle a, lirthei leh kea kalte tan a him lo a, vawi tam tak chetsualna a thleng tawh. Truck parking mumal loh vanga harsatna tawk zawng zawngte palzûtna leh zahlohna lian takah kan ngai. VIP-te’n MZU-a programme an neiha truck ding mumal lo tak takte an reh duak thei si hian kan inremna hi kenkawh theih a ni tih a tichiang hle,” an ti.

MZUSC hian chetsualna nasa zawk a thlen hma leh mipui him zawk nan MZU JAC leh Mizoram sorkarin inremna an lo neih tawh ang ngeia truck parking kalpui turin Traffic SP an ngen nawn leh a ni.

MZUSC chuan, traffic police-te’n Mizoram sorkar leh MZUJAC inremna anga truck parking an kalpui thei lo a nih chuan, May 29, Thawhlehni aṭangin MZU zirlaite’n inrem­na chu an kenkawh mai a ngai tawh dawn tih an sawi a; chumi chungchang chu Mizoram Truck Owners Association hruaitute pawh nimin khan an sawipui.

MZUSC chuan, MZU zirlaite ngeiin hma an lak a ngai ta chu pawi an tih thu tarlangin, “Sorkar nen kan inremna anga truck hi park-na hmun tur dik takah park a nih chuan veivâkte tan harsatna a awm lo. Kan inremna hian en zui a hlawh lo leh kenkawh a ni lo hi harsatna min siamtu ber a ni,” an ti a; an hmalakna vanga harsatna tâwk an awm a nih chuan hriatthiamna an ngen a ni.