Myanmar raltlante tuamhlawm vangin lawm
Zo Reunification Organisation (ZoRO) general headquarters chuan thuchhuah siamin, tun hnaia Myanmar ram aṭanga Zo hnahthlak raltlan, Mizorama rawn lutte sorkar leh khawtlangin ṭha taka an lo ṭanpui chu lawmawm an tih thu an tarlang.
ZoRO chuan, Ralie khua, Rakhine (Arakan) state, Myanmar-a inkulh Arakan ralthuam keng pawl (Arakan Army) leh Myanmar sipaite inkâp mai theia an awm vanga himna zawnga Mizoram chhung, Lungpuk leh Khaikhy khuaa lutte Mizoram sorkar, tlawmngai pawl leh khawtlang hruaitute’n an lo tuamhlâwm chu ropui an tih thu an sawi a, “Himna leh thlamuanna zawnga lo kal kan unaute khaw dang sial en mai lo a, ṭha taka buaipui an ni hi thlamuanthlak kan ti hle. Thil ṭha titute thâ leh zung leh insensonate a thlawn lo ang tih kan ring tlat a ni,” an ti.
Myanram rama Zo hnahthlak, Mizorama rawn raltlante hi an awmna khaw hotute leh Assam Rifles, Siaha DC leh SP leh an rawn luhna khawtlang hruaitute ruahmanna angin May 24, Nilaini khan an khaw lamah an let leh tawh a; AR spaite leh Mizoram police-te’n ramri thleng hruaiin, ramri-ah Ralie khawtlang hruaitute’n an lo hmuak a ni.
Ralie khaw hotu Chebei chuan, an khaw mite raltlan tuamhlawmtu Lungpuk leh Khaikhy khawtlang te, Assam Rifles te, Siaha DC leh police-te leh MADC sorkar chungah lawmthu a sawi tih tuh dawnna chuan a tarlang.