Asst. professor lakna siamthat phût
MZP chuan thuchhuah siamin, Institute of Advance Study in Education (IASE)-a sssistant professor laknaah a tling zawk la loin, a tling lo zawk lak a awma an hriat thu an tarlang a; enfiaha siam-ṭha turin thuneitute an phût nawn.
IASE-a assistant professor tur laknaa thil dik lo a awma an hriat chu thuneitute hnenah an thlen tawh tih sawiin MZP chuan, “Kan thu thlenin awmzia a nei lo hi pawi kan ti hle a ni,” an ti.
MZP tarlan danin, IASE-a assistant professor tur 11 laknaah April 6, 2017 khan Mizoram sorkara Higher & Technical Education department-in notification a tichhuak a; hna laknaah hian induhsakna tam tak a awm ngeiin an ngai a ni.
Sociology subject atan advertisement-a a lan danin, qualification-ah M.A (Sociology) with M.Ed. emaw, M.A (Education) with B.Ed. tih a ni a; assistant professor atana an lak tak erawh chu Sociology subject emaw, Education subject-a master degree nei a ni lo a, a qualification chu M.A (History), M.Ed., a ni a, NET a nei.
MZP chuan, “MZP chuan induhsakna uchuak tak a awmin a hria a, a ṭul dan angin thuneitute’n enfiah a, siamṭha nghal turin kan phût a ni,” an ti.
Life Science subject assistant professor atana lak Longjam Shantabi chungchangah MZP chuan, “Education background nei ngei tur a ni an tih laiin, Science background nei an la daih hi zirna lama hriatnaa kan la hniamzia tilangtu a ni,” an ti. Longjam Shantabi hi M.Sc (Zoo), M.Ed., Ph.D (Zoo) a ni a; Life Science asst. professor atana advertisement-a qualification tarlanah chuan, M.Sc (**) with M.Ed. (****) tih a ni.