CSS hnuaia hmalaknate thlirho

Siaha District Development Coordination & Monitoring Committee chu, nimin khan DC conference hall-ah Rajya Sabha MP Ronald Sapa Tlau hoin an ṭhu a; an district chhunga CSS hnuaia hmalakna hrang hrangte an thlirho.

Ronald Sapa Tlau chuan Committee member-te fuihin, “Officer, an post-na hmun apianga ṭha-hnemngai taka thawk ṭhin leh an rawngbawlsak mipuite hmangaihna nena hnathawk ṭhin chu, an post-na hmun apiangah mipuiin an ngainá a, anni pawhin an post-na hmun apiangah nuam an ti ṭhin,” a ti a; transfer order nghak reng renga hun hmang officer chu mahni a intihhrehawm bakah, hmangaihna nen mipui rawng a bàwlsak a thei lo ṭhin tih a sawi.

Meeting-ah hian resolution an pass a; ‘Kan district-in PM’s Award for Excellence in Public Administration kan dawn theih nana thawktu department, a bik takin DC, DHO, DRDA, DAO-te DDCMC meeting hian kan lawmpuiin kan chhuang hlawm hle. He kan PM’s Award kan dawn hian CSS hmanga mipui rawng kan bawlna kawngah ṭhahnemngai lehzual ṭheuh tur leh thawhhona ṭha zawk nei turin chona thar min pe rawh se,’ an ti.