Dan bawhchhiaa CM puhna ACB-in an chhui chiang dawn

22nd July, 2022

Mizoram First Movement (MFM)-in Lengpui Airport tihchangtlunnaah dan bawhchhiatna awma an ngaih avanga chief minister Zoramthanga chhui tura Lokayukta an ngenna chu bawhzui a nih hnuah, Lokayukta chuan chhui chiang turin Anti Corruption Bureau (ACB) a hriattir.

Lokayukta hian Lengpui Airport cheiṭhat hna enkawltu PWD-te chu document hrang hrangte dilin, hriat fiah duh an neihte an zawt chiang nghal a; MFM-in an puhna leh PWD-in document an thehluhte an zir chian hnuah Lokayukta chuan thutlukna siamin, chhui chiang turin ACB a ruat a ni. ACB chuan investigation officer tur an inruat tawh.

MFM hian Lengpui Airport tihchangtlun hna (contract) inpek chungchangah dan bawhchhiatna awm ngei niin an ngai a, mawhphurtu bera an puh Chief Minister chu finance leh audit lama mi thiamte chhui chiantir ngei turin April 11, 2022 khan Lokayukta-ah ngenna an thehlut a ni.

PWD changtu Chief Minister chu a thuneihna hmang sual leh chhungkhat laina duhsak uchuakah puhin MFM chuan, "India danpui Article 14 a bawhchhiat avang te, General Financial Rules (GFR) 2017-a rule 162-na leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah ngenna kan thlen a ni," an ti.

Tarlan tawh ṭhin angin, Mizoram Lokayukta hian investigating agency an la nei lo a, thubuai an dawn, chhui chian ngai nia an hriatte chu ACB emaw CBI emaw an chhuitir thei a ni.

Lokayukta chairman Lalsawta chuan, thubuai an dawn zinga pahnih chu an zir chian hnuah CBI hnenah chhui turin an thawn tawh tih Vanglaini a lo hrilh tawh a, "Kan zir chian hnuah ACB tana harsa deuh tura kan ngaihte CBI-ah kan thawn. Mahse, state sorkar lamin phalna an pe lo a nih hmel. Keini chuan chhuitir duh mah ila, state sorkarin phalna an pek loh chuan kan chhuitir ngawt thei lo," a ti.

Lokayukta Chairman sawi danin, thubuai pahnih chhui tura CBI hnena an ngente chu sorkara tlatlum deuh leh milian deuhte an ni a; CBI pawhin Mizoram sorkarah chhui phalna an dil ve ve a ni.