MSACS leh CYMA-in thuthlung an ziak

Mizoram State AIDS Control Society (MSACS) leh Central YMA chuan HIV/AIDS donaa thawk dun turin nimin khan thawh dunna thuthlung an ziak. Thawh dunna kaltlangin district-ah leh thingtlangah nasa zawkin HIV/AIDS doa hmalak tum a ni.

MSACS chuan thuthlung ziah chungchangah thuchhuah siamin, Mizoramah HIV a darh nasa a, ṭhalaite zingah a darh nasa zual tih a tarlang a, "Thingtlang leh khawpui bâng chuang loin, state chhunga district tinah HIV nasa takin a darh. HIV vei tam ber chu mipat hmeichhiatna aṭanga inkai an ni a, a dawtah ruihhlo tite zingah inchiuna hriau inhman ṭâwm aṭanga inkai chhâwngte an ni," an ti.

HIV chu mipui náwlpuiah nasa takin a lut tawh tih sawiin MSACS chuan, inngaizawngte inkara mipat hmeichhiatna hman aṭang te, nupa inrinawm loh san vang te, tun hma lama kawppui (ngaihzawng emaw nupui/pasal) hmasa aṭanga lo kai tawhte'n a hnua an kawppuiteah HIV an kài tam thu an tarlang.

MSACS chuan, HIV vei zinga a tam ber chu ṭhalai, kum 15-49 inkar an nih thu an tarlang a, "Ṭhalaite zingah HIV a darh zel chuan kan khawtlang leh ramah nghawng ṭha lo tak tak - hnam inthlah pung chak lo, ṭhalai hna thawk tur hrisel lo, ram hmasawnna tur nasa taka tlahniam, chhungkua, khawtlang leh ramah retheihna nasa takte, fahrah leh khawtlanga harsatna nasa takte kan la hmachhawn dawn a ni," an ti.