Health care scheme atan ADB loan hmuh a la ni lo

Mizoram sorkarin Mizoram State Health Care Scheme (MSHCS) atana Asian Development Bank (ADB) aṭanga sum pûk a tum chu tihfel tawh nia sawi ni mah se, Mizoram sorkarin a la dawng lo.

Vanglaini palai zawhna chhangin Health minister Dr R Lalthangliana chuan, ADB loan pûk turin sorkar laipuiah tihfel ngaite tihfel a ni tawh a, an remtihna hmuh a nih tawh thu a sawi a, "Mizoram sorkar leh ADB indawrin, thil ṭulte an buaipui mek a ni. ADB loan pûk tur hian a kalkawng a thui a, tihfel ngai a tam avangin thil a kal zung zung thei lo," a ti.

Dr R Lalthangliana chuan, ADB sum pûk turin sorkar laipui hmin ringawt pawh thil hautak tak a nih thu sawiin, "Ministry dang zawngin min remtihsak hnuah Ministry of Finance lamin min remtihsak thei lo a, Chief Minister hriatpuinain anni lam hi ka dawr a, vanneihthlak takin min remtihsak thei a ni," a ti a, sorkar laipui remtihna an hmu thei chu lawmawm a tih thu a sawi.

Mizoram sorkar chuan MSHCS atan ADB sum vbc. 1,000 pûk a tum a, loan a pûk thei a nih chuan sorkar laipuiin cheng vbc. 720 a rûl ang a, a bak cheng vbc. 280 chu Mizoram sorkar rulh tur a ni.