Thla nga chhungin kohhran 50-ah Synod-in campaign a kalpui tawh

Mizoram Presbyterian Kohhrana Synod Social Front chuan kumin March thla aṭanga nimin thleng khan tualchhung kohhran 50-ah campaign an buatsaih tawh a, politics kalphung ṭha leh thil dangte an inzirtir ṭhin.

Mizoram Synod thu puanzarna pakhat, Synfo tarlan danin, Synod Social Front chuan kohhran mipuite'n nun kawng dik an zawh theih nan kawng hrang hrangin zirtirna an kalpui ṭhin a; political education te, ei leh bâr lam te, ruihhlo leh HIV/AIDS chungchangte, social media hman dan ṭha te, ram ngaw, nungcha leh tuihna humhalh chungchangte kohhran mipuite hnenah an zirtir ṭhin a ni.

Covid-19 avanga kum hnih chhung hmalak theih a nih loh hnuah Synod Social Front chuan kumin March thla aṭang khan hma an la leh ṭan a, nimin thleng khan tualchhung kohhran 50-ah campaign an buatsaih tawh. August thlaah pawh kohhran 20-ah campaign nei turin an ruahman bawk.

Synod Social Front chuan tun kar tàwp, July 23-24 chhung hian Kolasib khawpuia tual­chhung kohhran 13-ah campaign beihpui an thlâk dawn a, beihpui thlak turin Aizawl aṭangin campaigner 11 an kal dawn bakah, Kolasib-a pastor awm mek mi paruk­ te chu campaigner atan an hmang dawn a ni.