JE veia rinhlelhin a vei lo tih finfiah

Thenzawl khuaa tun hnaia Japanese Encephalitis (JE) vei nia rinhlelh chu antibody test (ELISA) hmanga endikah positive mah se, RTPCR hmanga endikah a negative tih Health department chuan a puang a, chî-àina tur a awm lo tih a tarlang.

Health department tarlan danin, antibody test hmanga endikah Thenzawlah JE hmuh ni mah se, finfiahna tling a nih loh avangin CSF sample chu endikna rintlak zawk RTPCR hmangin Lal Path Laboratory, Kolkata-ah endik a ni a; July 20, Nilaini khan result hriat niin, a negative a ni. Hei vang hian Thenzawla JE vei nia rinhlelh chu JE vei anga pawm theih a ni lo.

Health department hotute chuan investigation mumal zawka JE chungchang kalpui ṭha an ti a, epidemiological, entomological leh environmental investigation-te neih an rél a; Mizoramah RTPCR test ti thei turin hma an la nghal bawk.

JE chungchangah mipui tan chî-àina tur a awm lo a, chak taka hmalak zel a ni dawn tih Health department chuan a tarlang.