KHAWTHLIR

Chawimawina hlân
India ram zalenna kum 75-na lawmna, Azadi Ka Amrit Mahotsav kal zelah nimin khan Lunglei DRDA Project Director pisaah India tana zalenna sualtu (freedom fighter) zinga mi Darthawma Renthlei (L) leh padma shri awardee RK Lalhluna te chawimawina hlan an ni. Darthawma Renthei (L) hi kum 1920 khan Pukpui khuaah a piang a; November ni 27, 1940-ah British Army zawmin, a hnuah Indian National Army a zawm a ni. India zalenna sualtute tana siam Tamrapatra Award chu August 15, 1973 khan hlan a ni a, July 21, 2019 khan a thi. RK Lalhluna hi thu leh hla lama a thawhhlawk avangin kum 1991 khan padma shri hlan a ni a, tunah hian kum 84 a ni.

Dawr endik
Lawngtlai District Food Safety Committee rorel bawhzuiin Food Safety Inspection Team chuan July 20, Nilaini khan Lawngtlai Chandmary huam chhunga thingpui dawr, restaurant leh sa zawrhnate an endik. Dawr neitute hnenah mipui hrisel zawkna turin thianghlim leh hrisel zawka ei leh in sawngbawl dan an zirtir nghal a ni.

Heroin no. 4 man
West Phaileng police-te chuan July 20, Nilaini khan heroin no. 4 gram 2.16 an man a, a neitua puh Vanlalfela (27) s/o Vanlalruata Sailo leh Jacob (46) s/o Lalthanga, West Phaileng ve vete an man nghal. Heroin an man hi international market-ah Rs 10,00,000 hû a ni.

SMATEE seat
State Medical and Technical Entrance Examination (SMATEE), 2022 kaltlanga seat pek tur atan July 24, Pathianni tlai dar 5 thleng first round online choice filling hun hawn a ni a, dhte.mizoram.gov.in ah thehluh theih a ni.

Inziah luh theih
Lunglei District Agriculture Officer chuan thuchuah siamin, PM-KISAN scheme-ah September 30, 2022 thleng chhungkaw pakhat aṭangin mi pakhat zel inziah luh theih a nih thu a tarlang. PM-KISAN hnuaiah hian kum khatah Rs 6,000 (instalment vawi thumin) dawn theih a ni a, inziak lut tawh tan dil nawn a ngai lo. Bialtu BDO, common service centre (CSC), online-in pmkisan.gov.in/ ahte inziah luh theih a ni a, CSC leh mahnia inziak lut tan BDO-ah pawmpuina dil a ngai a ni.