Agriculture Minister-in Tractor paruk a vailiam

Agriculture minister C Lalrinsanga chuan nimin khan Melthum Silaimualah Sub-Mission on Agricultural Mechanization hnuaia Agricultural Machineries and Implementation for Custom Hiring Centre atan tractor paruk a vailiam.

C Lalrinsanga chuan, agricultural mecha­ni­zation chu sorkar laipuiin na zawka kalpui a tum thu sawiin, "Leilung hmanga thar a tam zel theih nan tractor-te hi ṭangkai takin hmang ang che u. Neitu bik awm loa member tinte'n a ṭula an hman theih tur a ni a, mimal pumbilh bik an awm a nih chuan department hotute nen agreement an sign milin hmalak a ni ang," a ti a; sorkarin theihtawp a chhuah nia sawiin, loneitute pawhin theihtawp an chhuah ve a ṭul thu a sawi.

'Mizoram hi a ding­chhuak tur a ni' tih rilru púa hna thawh a ṭul thu sawiin Minister chuan, "Rabi season chhungin pulse production a tam theih nan hmalak mek a ni a, mipui tam zawk leh harsa zawkte pawhin hriselna atana pawimawh protein tamna pulse man tláwm zawka an leih theih nan he hmalakna hi bul ṭan a ni," a ti.

C Lalrinsanga chuan, Thingdawlah aeroponics hmangin alu kalpui mek a nih thu te, Falkawnah bekang hriak herna khawl bun mek a nih thu leh thlai thar dahṭhatna tur solar cold storage buaipui mek a nih thute a sawi bawk.

Mizoram hmun hrang hranga loneitu intêl khawm pawl 25 hnenah tractor leh lei lehna hmanraw dangte pek tum a ni a, loneitu pawl pakhat zelah khawl leina turin cheng nuai 9.50 zel pek a ni. Khawl leina man chu sorkar laipuiin 90% a tum a, Mizoram sorkarin 10% a tum thung.

Mizoramah custom hiring centre 233 din a ni tawh a, tractor leh lei lehna hmanrua 258 pek chhuah tawh a ni.