Minister-in Mamit-ah MCO a hawng

Minister of state Robert Romawia Royte chuan July 20, Nilaini khan YMA, Mamit Sub-Hqrs. Committee Room-ah Mizo Cultural Organisation (MCO) Sub- Headquarters, Mamit a hawng.

Minister chuan, kawng hrang hrangin Mizo hnam nunzia rùna a awm mek laia Mamit MCO Sub-Hqrs hawn theih a ni chu lawmawm a tih thu sawiin, "Kan hnam culture kan vawn nuna kan humhim zel theih nan MCO-te in pawimawh dawn a ni," a ti a; pawl hrang hrangte chu ṭha tak leh inpawh tlang taka thawkho zel turin a chah.

Mizo hnam humhalh kawngah harh tharna thleng se a duh thu sawiin Robert Romawia chuan, "Hnam ziaráng a ral chuan a mihring awm mah se, Mizo hnam tan a pawi thei. Kan hnam chìn dante theihtawpa chawi nun zel i tum ang u," a ti.

Thusawitu dang MCO Gen.Hqrs secretary Lalbiakhlua chuan MCO member nih chuan YMA hle tur a nih thu sawiin, Mizo tlawmngaihna hrang hrangah te, hawihhawmna kawngahte leh aia upa zahna kawngahte midangte tihhmuhtu nih tum ṭheuh turin MCO member-te a chah.