Handloom training centre hmun tlawh

Local Administration department (LAD) minister K Lalrinliana chuan nimin khan Thenzawla Handloom Design Training Centre sakna tur hmun a tlawh.

Handloom Design Training Centre hi LAD-in RGSA hnuaia Economic Development and Income Enhancement Component hmanga an sak tur a ni a, project atana sum ruahman chu nuai 141 niin, in sakna atan bik cheng nuai 68 ruahman a ni.

In sak a nih hunah chuan sales unit leh training unit-te a awm dawn a, Thenzawl VC leh Handloom Association, Thenzawl ten an enkawl tur a ni. Project hian in sak bakah training, exposure tour leh marketing a huam tel bawk.

K Lalrinliana chuan, Thenzawl chu Mizo puan tahna hmunpui leh hralh chhuak tam khua a ni tih sawiin, chhungkaw tam takin eizawn nan puantah an hmang a, an puan tahte mawi leh ṭha zawka an tih theihna turin Handloom Design Training Centre sak tum a nih thu leh a ṭangkai hle dawn thu a sawi.