Sum dinhmun dik tak puangzar turin ZPM party-in Chief Minister an phût

ZPM party chuan Mizoram sum dinhmun dik tak a rang thei ang bera mipui hnena puangzar turin Finance minister Zoramthanga, chief minister an phût.

ZPM chuan thuchhuah siamin, Finance Commissioner sawi aṭangin Mizoramin sum leh paiah harsatna a tâwk nasa lehzual dawna a lan thu an tarlang a, "Mizoram sum dinhmun dik tak a rang thei ang bera mipui hnena puangzar turin Finance minister Pu Zoramthanga kan phût," an ti.

Mizoram sum dinhmun ṭhat loh chhan chhuanlamah MNF hruai sorkarin Covid-19 a hmang fo tih sawiin ZPM chuan, "Hei hi chhuanlam tling a nih loh thu kan lo sawi tawh ṭhin," an ti a; Covid-19 avangin sum hmuh tur ang hmu phâk lo deuh mah se, hmuh loh tura ngaih sum eng emaw zat Mizoramin a hmuh ve tho thu an sawi.

ZPM chuan, sum leh paia Mizoram harsatna tawh chhanah tun thlengin Covid-19 vang a nih thu sorkar hotute'n an la sawi uar viau laiin, Covid-19 vanga sorkar laipui aṭanga sum hmuhte leh mipui, kohhran, pawl leh company-te aṭanga ṭanpuina hmuh leh dawnte sawi lan a ni ngai lo tih an tarlang a, "Sum leh paia kan harsatna tawh chhanah chhuanlam dang dang siam ṭhin mah se, a chhan bulpui ber chu sum enkawl thiam lo sorkar kan hrawn vang a ni," an ti.

Sum dinhmun siamṭha turin sorkarin ṭul loa sum hman a tihtàwp a ṭul thu sawiin ZPM chuan, "Sum dinhmun siamṭhat tumna nei miah lo ang maiin nuam chên chungin ram an hruai a ni ber a, a pûk theih zawng zawngah a pung nena rulh leh ngaiin sum min pûkpui a ni ber," an ti a; "Hetiang khawpa sum leh pai enkawl kawnga hlawhchham sorkar hi Mizoram sum enkawl tur hian kan ring zui zel ngam dawn em," tiin uluk taka ngaihtuah turin mipui an sáwm a ni.

ZPM party chuan, Mizoram sorkar chu centrally sponsored scheme (CSS) hmanga inawi nung hram hram a nih thu sawiin, "CSS atana state matching share tur takngial pawh nei hleithei lo khawpa kan awm ṭhinte ngaihtuah hian, kan dinhmun a ṭha lo hle tih a chiang," an ti bawk.