Sum leh pai aia Mizo mipui mamawhna dah pawimawh turin MZP-in doctor-te an ngen

MZP Headquarters, Kolasib chuan thuchhuah siamin, Mizo­ram sorkarin doctor a chhawr lai zingah Aizawl aṭanga sawn chhuah theih loh a nei ṭhin chu pawi an tih thu an tarlang a; doctor-te chu sum lei pai aia Mizo mipui mamawhna dah pawi­mawh turin an ngen bawk.

Kolasib MZP chuan, Mizoram sorkarin a rawih doctor zingah Aizawl aṭanga sawn chhuah theih loh a nei chu pawi an tih thu sawiin, "Heng mite hi private clinic nei, sorkar aṭanga hlawh la chunga an private clinic chhuahsan duh lote an ni," an ti.

Sorkarin Aizawl aṭanga doctor a sawn chhuah theih loh zinga pakhat phei chuan Kolasib-a awm ai chuan a hna bànsan a duh zawk thu a sawi tih tarlangin Kolasib MZP chuan, "A pawi kan ti a, mi rethei leh harsa zawk, thingtlang mite hmuhsitnaah kan ngai," an ti a; a duh ang chu sorkarin a tihpuitlinsak ngei an beisei thu an sawi.

Kolasib MZP chuan, Aizawl chhuahsan duh lo mi tlemtête'n doctor ṭha tak tak, mahni hnaa inpe, damlote tana inséng zawk ṭhin, mipui fak rawn doctor dangte hmai an tibâl tih sawiin, "An chungah sorkarin action la ngei se kan duh," an ti. Non Practising Allowance (NPA) la chunga clinic nei, mahni office hours chhunga hun hmang zo lo tam tak avangin mi harsa leh rethei zawkte'n nasa takin an tuar tih sawiin, "Hengte avang hian clinic nei, NPA la an awm a nih chuan a rang thei ang bera tihtawpsak turin sorkar kan ngen a ni," an ti bawk.

Mizo doctor zawng zawng deuh thaw chu tribal quota aṭanga MBBS zir an ni tih sawiin MZP chuan, "Tribal quota hauh vang hian zirlaite phei chu vuak leh kut tuar hnem ber kan ni. Kan mamawh veleha an sum hmuhna chauh an thlir leh si hi kan dem tak zet a ni," an ti a; zirlaite'n hnam rilru pûa quota an hauh nat angin, sum leh pai aia Mizo mipui mamawhna dah hmasa turin doctor-te an ngen a ni.

Kolasib MZP chuan, Mizo­ram sorkarin Kolasib District Hospital-a medical superinten­dent tur a ruat thar mi palite'n an zawm duh loh hnua July 5, 2022-a sorkarin a dah Dr Samuel Lalfakawma Fanai-in a mawhphurhna a pawm chu lawmawm an tih thu an tarlang bawk.