Bekang um eisual vangin mi 12 damdawi-inah dah an ni
Thenzawlah bekang um eisual mi eng emaw zat an awm a, nimin khan mi 12 chu Thenzawl damdawi-in (CHC)-ah dah an ni. Bekang eisual vanga inentir hrim hrim chu mi 20 chuang an ni.
Thenzawl aṭanga thu dawn danin, Thenzawl Kanan Venga bekang um ṭhin chhungkaw pakhat chuan an bekang um chu kumin July 19-20 khan an veng chhungah an zuar a, chhungkaw eng emaw zatin an lei. Bekang eitute chu July 20 khan an insawisel hlawm a, mahse, bekang eisual tih an inhre lo a, ṭhenkhat chuan Covid-19 vei an inringhlel a ni.
July 20, Nilaini zanah mi ṭhenkhat chu damdawi-inah an inentir a, bekang um an eisual tih hriat chhuah a ni. Khawsik, pum ná, kawṭhalo, blood pressure hniam leh thawhah an ni hlawm.
Bekang um tur - bekang hûm chu Myanmar aṭanga an lâk niin, a hma pawhin an lo um tawh a, a hmain harsatna a awm ngai lo niin bekang umtute chuan an sawi.
Thenzawl CHC-a medical officer Dr Remlalnghaki sawi danin, bekang um leh bekang hûmte chu hmunpui lamah enfiah tura thawn a ni ang.