Covid-19 dona atan state sum Nuai 977 hman a ni tawh
Finance department chhinchhiah danin, Covid-19 dona atan Mizoram sorkar chuan July 7, 2020 thleng khan state sorkar sum cheng nuai 977 leh sorkar laipui sum cheng nuai 1336 a hmang tawh a, a vaiin nuai 2313 a ni. Hetihlai hian Covid-19 dona atan hian Chief Ministers' Relief Fund aṭangin cheng nuai 1124 hman a ni tawh.
Covid-19 dona atana state sum hman a nih dan chu - Health department hnenah kum 2019-20 khan cheng nuai 550 leh kum 2020-21 ah cheng nuai 84 pek a ni a; Police department hnenah kum 2020-21 ah cheng nuai 343.97 pek a ni. Health department hnena pek cheng nuai 84 bik chu rapid antibody test (RAT) hmanrua (kit) leina tur a ni a, Police hnena sum pek chu kumin March leh April thlaa an senso phuhrûkna tur a ni thung.
State Disaster Response Force (SDRF) sum cheng nuai 305 chu Health department hnenah pek a ni a; hei hi SDRF aṭanga a hranpaa hmuh ni loin, 14th Finance Commission-in an chanvo tura a dah sa a ni. SDRF sum vêk hi district DC-te hnenah nuai 214.28 pek a ni a, hei pawh hi 14th FC-in an chanvo tura a dah sa tho a ni.
Health department hnenah North Eastern Council (NEC) sum cheng nuai 300 pek a ni tawh a, chu chu Covid-19 vanga a hranpaa sorkar laipuiin a pek a ni thung. National Health Mission (NHM)-in Health department hman turin cheng nuai 788 a pe a, mahse, chumi zinga nuai 371 chu NHM hnuaia thawkte hlawh atana hman tur a ni. Hei vang hian NHM sum hi Covid-19 dona atan bika hman tur chu nuai 417 a ni. Health department vêk hian AYUSH
aṭangin Covid-19 dona atan cheng nuai 100 a dawng tawh bawk.
DoNER-NESIDS chuan Health department-in hmanrua an leina atan cheng nuai 1,616 a pawm tawh a, sum erawh hmuh a la ni lo. Hetih lai hian, Covid-19 dona atan Chief Ministers' Relief Fund aṭangin July 15, 2020 thleng khan cheng nuai 1124 hman a ni tawh. CM Relief Fund-ah hian Covid-19 dona atan July 15 thleng khan cheng nuai 1994 a lut tawh a, hman loh cheng nuai 870 a la awm a ni.
Covid-19 dona atana sum hman dan (Rupees in lakh)
Hmuhna Hmangtu Sum zat Hmuh kum (Rs. in lakhs)
State sorkar Health dept. 550 2019-20
State sorkar Police dept. 343.97 2020-21
State sorkar Health dept. 84 2020-21
SDRF Health dept. 305 2019-20
SDRF District DC-te 214.28 2019-20
NEC (DoNER) Health dept. 300 2020-21
NHM Health dept. 417 2020-21
AYUSH Health dept. 100 2020-21