Covid vanga thi mi pakhat a awm belh

July 20, Nilaini khan Mizoramah swab sample endik mi 594 aṭangin Covid-19 vei mi 138 hmuh chhuah a ni a, July thla chhungin mi 2,098 hmuh a ni tawh. Nimin khan hripui vei dam tawh mi 170 chhuahtir an ni a, Covid-19 vangin Nilaini khan mi pakhat a thi.

Nilainia hripui vei hmuh tharte chu mipa 66 leh hmei­chhia 72 an ni a, TrueNAT hmanga hmuh chhuah mi pakhat leh Rapid Antigen Test hmanga hmuh mi 137 niin, positivity rate 23.23% a ni.

Covid-19 vei enkawl lai Lalrotluanga (57), Dawrpui Vengthar chu July 20 tlai dar 6:08 khan hripui vangin State Referral Hospital-ah a thi. Amah hi Covid-19 positive a ni tih July 11, 2022 khan hmuh chhuah niin, SRH-ah dah luh nghal a ni a, natna dang nei tel a ni.

IDSP record angin, Mizo­ramah Covid-19 vei 2,31,204 hmuh chhuah a ni tawh a, mipa 1,07,638 leh hmeichhia 1,23,566 an ni a, mipa aiin hmeichhia 15,928-in an tam zawk. Nimin tlai dar 5 thleng khan mi 2,29,788 (99.39%) chhuahtir an ni tawh a, mi 707 (0.31%) thi tawhin, enkawl mek mi 709 (0.30%) an awm.

Kum 2011 chhiarpui angin, Covid-19 vei hmuh tawh 2,31,204 chu state mipui zat aṭangin 21.07% a tling a; mi 1,000 zelah positive 210 an awm tawh ang a ni a, hripui vangin mi 1,00,000 zelah mi 64 an thi tawh ang a ni.

Nimin tlai dinhmun angin, Mizorama district 11 zingah Covid-19 positive awm lohna district a awm tawh lo a, active case tamna ber Aizawl district-ah mi 356 an awm a, Lunglei district-ah mi 138 an awm bawk.