LRS dept.-in voucher awm loin Cheng vbc. 2.02 an hmang

Land Revenue & Settlement (LRS) department chuan kum 2011-2014 chhung khan cheng vbc. 2.02 an hmang a, mahse, an hmang ngei a ni tih finfiahna a awm lo.

Comptroller and Auditor General (CAG) of India report-in a tarlan danin, National Land Records Modernisation of Programme (NLRMP) hnuaiah LRS department hnenah hian land record tihchangtlunna atan te, ram/bungrua inchuh tam lutuk tihrehna atan leh langtlang taka land record kalpui a nih theihna atan cheng vbc. 8.87 pek a ni.

Chu'ngte chu kum 2011-2014 chhungin district pathuma tihpuitlin tura ruahman a ni. Mizoram sorkar chuan January 2013 leh June 2015 khan cheng vbc. 8.87 hmanna, utilisation certficate chu sorkar laipuiah an thehlut a; sum hman dan an tarlante chu - minor work atan cheng vbc. 1.44, khawl leh bungraw leina atan cheng vbc. 1.82 leh survey neihna atan cheng vbc. 5.61 a ni.

Cheng vbc. 8.87 aṭang hian cheng vbc. 2.02 chu Revenue Director chuan October 2013 aṭanga March 2015 thleng khan district pathuma NLRMP tihhlawhtlinna atan an hmang angin a chhinchhiah a, mahse, voucher a awm lo.

Hetih lai hian, LRS department chuan, cheng vbc. 2.02 chu MR bill atan te, lirthei hman man atan te, training neiha lawmman (honorarium) atan leh thil ṭul dang atantea hman a nih thu an sawi.

CAG chuan an zirchianna aṭangin MR attendance ziahna a awm loh thu te, eng ang MR nge an nih tih te, MR rawih zatte leh MR chhawr an nih ṭan hun leh an hnathawh zawh hunte LRS department-in an nei lo tih an hmu chhuak.

Training neiha honorarium atana hman anga sawiah pawh, approved training programme a awm lo a, training-na hmun leh ní a awm lo a, training-a tel zat leh training rei hun chhung a awm lo a, leh training material leh trainee-te TA/DA pek zat record a awm lo tihte hmuh chhuah a ni.

Lirthei hman man atana sum hmang anga sawiah pawh, tu nge zin, engtianga thui nge an zin tih leh, approved travel plan pawh a awm lo tihte an hmu chhuak bawk.