H/W, Health Supervisor leh CHO-te lungawi loh vangin an châwl dawn

Mizoram Health Multipurpose Service Association (MHMSA) chuan an recruitment rules siamṭhat phûtin lungawi lohna an lantir mek a; May 29 aṭangin mass casual leave lak an tum bakah, June 5 aṭangin tiam chin awm loa chawlh an tum.

An thil phût leh lung­awi lohna an lantir chung­changah hian MHMSA hruaitute chuan nimin khan an pisaah thuthar thehdarhtute an kâwm. An president P Manliana chuan, "Kan lungawi loh­na kan lantirna chhunga mipuite'n an tuar tur hi pawi kan ti tak zet zet a, pawi kan ti a, mipui hriatthiam­na kan ngen a ni," a ti.

P Manliana chuan, kum 1982-2011 chhunga an recruitment rules (RR) hman ṭhin chu June 2011-ah tihdanglam a ni tih sawiin, "RR thar hi kan hman hnuah kan thawhhonaah harsatna tam tak kan tâwk nghal a, chuvang chuan, kum 2013 General Assembly-in kan rel angin, kum 2011 hma lama RR ang neih leh kan duh a ni," a ti a; an thil phût chu thil thar leh tihhlawhtlin harsa a nih loh thu a sawi.

MHMSA President sawi danin, kum 1982-2011 chhunga an RR ang chuan, promotion atan seniority vek hman a ni a, kum 2011-a RR tharah chuan promo-tion-ah 75% leh exam aṭangin 25% dah a ni.

MHMSA-ah hian health worker (HW), health supervisor (HS) leh community health officer (CHO)-te an awm a; RR an hman mek hman a nih hnuah health supervisor-ah mi 11 leh CHO-ah mi pathum chiah an la kaisang a, promotion post ruak tam tak a awm tih an sawi a, "Promotion a awm ngai mang lo a, a tam zawk hi post ngaia kum 20 chuang awm tawhte kan ni," an ti.

Zawhna chhanga an sawi danin, CHO post hi 32 awmin, chung zinga post 19 (59.4%) chu a ruak mek a, HS post 171 awmin, chu'ng zinga 79( 46.2%) chu a ruak mek. HW post ruak pawh tam tak a awm a, post ruak hnawhkhah nan sorkarin HW 185 lak thar a tum a, advertisement pawh chhuah a ni tawh.

RR siamṭhat an phût thu chu Hearlth minister Lal Thanzara hnenah vawi eng emaw zat an kalpui tawh tih sawiin P Manliana chuan, "Kan Minister hian min hrethiam a, min tihhlawhtlinsak a duh a, lehkha vawi thum a ziak tawh. Mahse, Health Secretariat lam hian ngaihdan dang an nei niin kan hria," a ti.

MHMSA hruaitute chuan, an thil duh, Health Minister pawhin a duhpui chu Health Secretariat leh DPAR lamin an dang tlat nia an hriat thu an sawi a; an thil phût chu tihhlawhtlinsak thuai turin sorkar an ngen nawn leh bawk.

MHMSA hian an thil phut sorkarin a tihhlawhtlin loh vanga lungawi loh lantir nan chawlhkar khat chhung, May 15-19 inkar badge dum an bel a; chawlh­kar khat dang, May 22 aṭanga nimin thleng khan pen down strike an kalpui. May 29, Thawhṭanni aṭangin June 2 thleng mass casual leave lak an tum a; thu lawmawm an hmuh loh chuan June 5 aṭangin tiam chin awm loa chawlh an tum a ni.