Modi hnuaiah ramin hma a sawn nasa - Prof. JV Hluna

BJP Mizoram Pradesh president Prof. JV Hluna chuan, prime minister Narendra Modi kaihhruai sorkar kum thum tlinna pualin nimin khan Aizawl Press Club-ah thuthar thehdarhtute a kâwm a; Narendra Modi kaihhruaina hnuaiah India ramin nasa takin hma a sawn niin a sawi.

Prof. JV Hluna chuan, PM Modi-a thupui chu 'Together we go, development for all' (Kan vaiin hmasawn nan i ṭangrual ang u) tih a nih thu sawiin, "A hna thawhnaa a principle chu 'Nation first, party second, self last' tih a ni," a ti a; NDA-ah political party 33 an tel a, BJP ringawtin sorkarna siam thei mah se, NDA-a tel party zingah hnawl an la awm lo a, ṭha takin an thawkho zel tih a sawi.

JV Hluna chuan, kum thum chhungin sorkar laipuiin kawngpui km. 8,000 chuang a siam hman a, miretheite in nuai 50 chuang leh ek-in nuai tam tak sak a ni tawh a, lawng chawlhna pathum siam belh a ni tih sawiin, "Hmeithai nuai 200 aia tam hnenah gas free connection pek a ni tawh a, nu nau neih hmasak berah Rs. 6,000 pek a ni," a ti.

Mizoram BJP President chuan, sipai pension tan One Rank One Pension hman a ni a, mi firfiak do nan surgical strike hlawhtling taka tih a ni tih a sawi a; thil man 5%-in a tlahniam a, demonetization vangin pawisam lem leh pawisa chhehrelh a bo bakah, PM Modi chu chhungkhat lainate tana hamṭhatna siamsak ngai lo niin a sawi.

Narendra Modi kaihhruai sorkara minister zingah corruption news a awm lo nia sawiin JV Hluna chuan, a hmalaknate avang­in India mipuiin an ngaihsang tial tial niin a sawi a, "Municipal election leh state election-ah a chak zel a, India state 17-ah a sorkar a, India ram geographical area 70%-ah hnehna changin, tunah chuan 'New India' a din mek a ni," a ti a; Modi chu India Constitution-a secularism humhimtu niin a sawi bawk.

Prof. JV Hluna chuan, Modi-a rawtna angin UNO-in June 21 chu International Yoga Day-ah a puang niin a sawi. Yoga chungchanga zawhna chhangin, BJP hruaitute chuan, "Article 371 hmangin kan duh loh chuan kan ti lo thei. BJP sorkar ta ila, kan culture leh sakhaw khawih a nih chuan kan ti lo ang. State sorkarin a duh loh chuan a hmang lo thei," an ti.

Kum 2014-a Lok Sabha inthlan result chu May 16, 2014-ah puan a ni a, BJP-in MP 282 neiin, an thawhpui NDA-a tel dangte nen MP 336 an nei a; Narendra Modi chu PM atan May 26, 2014-ah lak luh a ni a, nimin kha PM a nih kum thum tlin champha a ni.