Kum 2016-17 chhungin Lawngtlai dist.-ah MGNREGS-ah inhlawhna ni 34 siam

Lawngtlai District Development Coordination and Monitoring Committee chu nimin khan Lawngtlai DC conference hall-ah chairman Ronald Sapa Tlau, Rajya Sabha MP hoin an ṭhukhawm. Lawngtlai district-ah kum 2016-17 chhungin MGNREGS hnuaiah ni 34 inhlawhna siam a nih thu an tarlang.

Ronald Sapa Tlau chuan, "Meeting turin kan lo kal a, a ngai ang bawka kan haw leh chuan awmzia a nei dawn lo. Kan ṭhutkhawm aṭang hian kan chanpualah eng nge hmasawnna tur kan neih tih ngaihtuah a, ṭha zawka hna thawk zel tura rilru kan buatsaih a pawimawh," a ti a, meeting-a telte chu district tana ṭhahnemngai taka thawk zel turin a chah.

Meeting-a tarlan dan­in, MGNREGS hnuaiah kum 2016-17 chhungin Lawngtlai district-ah ni 34 inhlawhna siam a ni tawh a, ni thum dang inhlawhna tur a chhuak leh tawh. Tunah hian job card 29,674 a awm mek.

Pradhan Mantri Krishi Sinchayee Yojana hnuaiah project 17 awmin, project I & II chu March 2017-ah a tawp tawh a, project dang 15 la kalpui mek a ni. Pradhan Mantri Awaas Yojana-Gramin (PMAY-G) hnuaiah kum 2017-18 chhung atana target beneficiary 1,766 aṭangin first phase-ah beneficiary 696 thlan phawt a ni.