Eptute'n NLUP a hlawhchham niin an sawi

ZNP president Lal­duhoma, MNF vice president Dr R Lalthangliana leh MPC party chuan, Congress party kaihhruai Mizoram sorkar flagship progmme NLUP hlawhchhamzia Comptroller and Auditor General (CAG) report, May 25, 2017-a Assembly House-a pharh tâkin chiang takin a tarlang tih an sawi.

Lalduhoma chuan, CAG report thar tlangpui sawiin, NLUP thil tum pui ber pali zingah tihhlawhtlin a awm lo tih a sawi a, "Auditor-te'n beneficiary mi 7,954 an kawmna aṭangin 9% chauhin an dinchhuahpui tih an hmu. Beisei angin buh thar a pung lo a, buhfai mamawh 70% vel châwk luh belh reng a la ngai. Pathian programme meuh pawh hlawh­chhampuitute tan chuan, 'Hnár aw lian lian' a ni ta ringawt mai," a ti.

NLUP hlawhchham chhan chu a dawngtu tur thlan dan a dik lo a, party induhsakna atan hman vang a nia sawiin Duhoma chuan, "Synod Social Front-in a zir chian­-naah pawh a dawngtu 100% deuh thaw ruling party an ni an ti a ni," a ti a; trade thlan enpui loh vang te, instalment-a pek a nih vang te, enzuina ṭhat tawk loh vangte niin a sawi bawk.

MNF vice president Dr R Lalthangliana chuan nimina Zotlang Hall-a Aizawl West-I MNF Block political training-ah NLUP chungchang sawiin, "Congress-in NLUP kum kua an kalpui tawhah sum hman dan uluk taka zir chiangtu CAG report-in NLUP hlawhchhamzia a tilang hi sorkar mualphona a ni a, a zahthlak hle," a ti.

Dr R Lalthangliana chuan, NLUP leh MNF programme SEDP chu a inang lo tih sawiin, "Thawh theih leh tih theih tur sain kan duang a, sum lamah buaina awm loin sorkar aṭanga rei loteah a takin hna kan thawk nghal char char dawn. SEDP chu a lo kalna tur sum hre sa veka duan a ni," a ti a; NLUP ang a nih dawn loh thu a sawi.

MPC party chuan, NLUP chu Congress party-in 'Pathian programme' ti hiala an sawm a ni tih tarlangin, "A zir chiangtu CAG report-ah NLUP kalpui danin belhchian a dâwl lohzia a lang hian NLUP hlawhchhamzia a tilang chiang hleah kan ngai," an ti.

MPC chuan, NLUP chuan Mizoram economy thlengin a nghawng dawn niin an sawi a, "Sorkar laipui aṭanga NLUP atana cheng vaibelchhe tam tak lo kal hman tawh anga tarlan, hman si lohte hi khawiah nge a awm?" an ti a; sum awmna sawifiah turin sorkar an phût a ni.