Myanmar raltlân chungchang sawifiah

1st Assam Rifles (AR) commandant, Col. BB Pun chuan Myanmar aṭanga Siaha district-a ral-tlan an awm chung­changah Siaha-a thuthar thehdarhtute a kâwm.

Col. BB Pun chuan, May 19-20, 2017 khan Myanmar rama Arakan state chhung, Ralie khua aṭangin raltlan mi 300 chuang chuan hel pawl, Arakan Army an hlauh avangin Myanmar ramri depa khaw pahnih - Lungpuk leh Khaikhy khuaah an luh thu a sawi a, "Raltlante dinhmun leh an hriselna enfiah turin Lunglei aṭangin Lt.Col. Vineet Kumar hoin sipai leh doctor rual tirh an ni," a ti.

Siaha district-a sorkar hotu te, Superintendent of Police, 1st. Assam Rifles, MADC sorkar leh MTP-te thawhhona ṭha avangin Ralie khuaa raltlante an khuaa hruai let an ni chu lawmawm a tih thu a sawi a, "Ralie khua VCP Pu Chebei ngeiin raltlante Myanmar ramriah a lo hmuak a ni," a ti a; ral­tlante chu an vaiin mi 338 an nih thu a sawi.