KHAWTHLIR
Minister-in enfiah
Finance minister Lalsawta leh UDPA minister Zodintluanga chuan nimin zing khan Dawrpui Multipurpose Centre tur sak mek an tlawh a, hna thawh dan an enfiah. Multipurpose Centre hi NLCPR sum cheng vbc. 11 chuang senga sak tur a ni a, 76% sak zawh a ni tawh. Centre-ah hian motor parking chhawng hnih, committee room, auditorium leh ruang dahna tur room-te awm tura ruahman a ni.
Health centre
Chawnpui Vengthlanga Health Clinic Centre din thar chu May 25, Ningani khan Health principal director Dr F Lallianhlira'n a hawng. Health Clinic Centre hi cheng nuai 13 senga sak a ni a, September 2016-a sak ṭan a ni.
Film Kûtpui
Children’s Film Society, India, Cinedarbaar leh Directorate of School Education-te chuan May 22, 2017 aṭang khan Mizoram district hrang hrang - Champhai, Serchhip leh Mamit-ahte Film Kûtpui an buatsaih a, May 28 thleng a awh ang. Film Kûtpui neih chhung hian zirna in hrang hrangah zirlaite tana zirtir nei ṭha film tihchhuah ṭhin a ni.
Lak luh khap
Mamit Additional DC chuan thupek chhuahin, tunlai hian China ramah Bird Flu a lên mek thu a tarlang a, "Nipui laia léng ṭhin vawk natna PRRS pawh lêng leh mai thei dinhmuna dinga hriat a ni. Heng hri laka district mipuite kan him theihna turin Mizoram páwn aṭangin ar leh vawk lak luh khap a ni," a ti.
Tlan phal lo
Traffic SP C Lalthanmawia chuan thupek chhuahin, June 1, 2017 aṭangin SIPMIU-in Aizawl Venglaia Zirtiri Science College bul aṭanga Electric Veng panna kawngah sewerage pipeline phûm hna an thawh dawn avangin, zing dar 9:30 aṭanga tlai dar 5 inkarah lirthei reng reng tlân leh kawng sira lirthei dah phal a ni lo tih a puang.