Hnathawh vil uluk a pawimawh - Chief Minister

Road and Infra-structure Development Board chu nimin khan an chairman Zoramthanga, chief minister hoin an ṭhukhawm. Chief Minis­ter chuan, hnathawh vil uluk a pawimawh thu a sawi.

CM Zoramthanga chuan, Road & Infras­tructure Board hna pawi­mawh tak pakhat chu Mizoram chhunga kawng siam leh enkawl bakah, in leh hmasawnna ruangám, ruhrel tihhmasawnna hnate chu Mizoram sorkar sum hmanga thawh a ni emaw, sorkar laipui sum hmanga thawh a ni emaw, a hmunah enfiaha contractor-te hmalakna en zui a nih thu a sawi a, "Hna ṭha taka thawh a nih ngei theihna atan a ṭul a nih chuan Board-in a nawrpui turin hma a la mai tur a ni," a ti.

Mizorama highway pawimawh tak takte chu sorkar laipuiin contract a pekte thawh a nih thu sawiin CM chuan, "Tun dinhmunah pawh hmun pakhata kawng siam hna thawh mek chu contractor-te'n labour harsatna an tawh avangin hna an ṭan thei lo a, lirtheiin harsatna an tâwk a ni," a ti a; kawngpui chu state sum hmanga enkawl tur ni lo mah se, mamawhna a nasat em avangin state sorkar sum hmanga thawm ṭhat a nih thu a sawi.

Chief Minister chuan, fûr ruahtui chu kawngin a tawrh nasat ṭhin thu sawiin, "Tun dinhmunah pawh kawng chhiat vanga mipui châk lakna kawng pawi­mawh tak takte chu kaltlang theih lohna a awm mai loh nan hmalak a pawimawh hmasa ber a ni," a ti. Ṭhutkhawmah hian Road & Infrastructure Development Board member-te chu kawngpui enfiah turin hmun hnihah an inṭhen a, remchang hmasa berah kawngpui an endik dawn a ni.