Chief Minister-in a remtih hnuah NECS-in chhiah nuai 126.6 a âwl
North East Consultancy Services (NECS) chuan hna lian tak tak hmun 19-a a thawh, Rs. 1,16,96,68,310 man aṭanga chhiah, value added tax (VAT) a pek tur Rs. 1,26,63,418 chu a âwl (pe lo) a; hei hi Mizoram sorkara an dil anga Chief Minister-in a remtih vanga awltir a ni.
RTI Act hmanga zawhna siamte Taxation department-in a chhannaa a lan danin, December 28, 2016-ah NECS proprietor & chief managing director Robert Romawia Royte-in Taxation Commissioner hnenah ziakin VAT âwl dilna a thlen a; a dilna thupuiah, "One time exemption of VAT in respect of NECS for Aizawl FC' tia ziah a ni.
Dilna lehkhain Taxation minister Lalsawta, Finance minister ni bawk a thlen hnuah Lalsawta chuan January 9, 2017 khan 'NECS-in chhiah âwl an dilna hi phalsak ni ta se, hmun hrang hrang aṭanga contract hna thawktute'n chhiah âwl an rawn dil ve theih avangin, lo zir chian ni se,' (Exemption, if allowed to NECS, may cause unprecedented complaint from many quarters, particularly those engage in works contract, pl examine) tiin note a siam a, Finance Commissioner (Taxation) LN Tochhawng hnenah thawn a ni.
Finance Commissioner (Taxation) chuan Minister note ziahna bulah chuan, 'In further order in the proposal at pre page' tih chauh ziakin parliamentary secretary (Taxation) KS Thanga hnenah January 28, 2017-ah a thawn.Parliamentary Secretary chuan, 'for approval pls' tih ziah belhin, January 31, 2017 khan Taxation Minister hnenah a thawn leh a ni.
Taxation Minister chuan, 'A pawi khawp mai, NECS hi chhiah (VAT) âwltir a nih chuan, contractor tam tak tan tui lian hawrh kuak ang maiin VAT âwl tumna kawngka kan hawng thei dawn a ni. (Regretted, approved will open a flood-gate as a large no of works contractors will claim similar treatment pl) tiin a ziak leh bawk.
NECS CMD Robert Romawia Royte chuan March 8, 2017 khan Taxation Commissioner hnenah kum 2016-17 chhung atana VAT âwl dilna (one time exemption) Mizo ṭawnga ziakin a thlen leh a; vantlang rawngbawlna leh ṭhalai hmasawnna atana a hna thawh vanga sum indaih loa harsatna lian tak tawk a nih thute ziakin, tlawmngai pawl (MFA & CYMA) pawhin an dilpui tih a ziah tel bakah, March 8, 2017-a Taxation Minister pisaa an sawihonaa thurâwn a dawn anga chhiah âwl dilna thehlut leh niin a tarlang.
Finance Commissioner (Taxation) chuan, Finance Minister-in a hmaa note sheet-a a lo ziah tawh angin, NECS-in VAT âwl a lo dil tawhna chu ennawn leh se a duh thu te, NECS-in a dil nawn lehna chu exempt a nih chuan, mi dang tan entawn tur ṭha lo tak a sim thei dawna a hriat thu leh, VAT chu awl a nih pawhin, vawi khat bak âwl lo tura a duh thute a ziak.
Finance Commissioner note sheet-ah tho hian, March 15, 2017 khan Parliamentaray Secretary (Taxation) chuan Taxation Minister hnenah ziakin, 'May be approved as proposed plz’ tiin a ziak. Hemi ni tho hian Taxation & Finance Minister chuan amaha thutlukna siam mai loin, Chief Minister hnenah 'The exemption sought by NECS may be approved as a special case pl' tiin a ziak ve leh bawk.
Taxation Minister lehkha chu Chief Minister Lal Thanhawla'n March 15, 2017-ah 'appproved' tiin a lo pawmpui a, NECS chu chhiah Rs. 1,26,63,418 awltir a ni ta a ni.