Mizoramin MBBS seat 38, BDS seat 11 a chang

Technical course hrang hrangah Mizoram chuan sorkar laipui hnuaiah kuminah Bachelor of Medicine and Bachelor of Surgery (MBBS) seat 38 leh Bachelor of Dental Surgery (BDS) seat 11 a chang a; engineering course atan seat 121 a nei bawk.

Higher & Technical Education department hnuaia Technical Wing hotute sawi danin, Mizo­ram quota-a MBBS leh BDS zir tur thlanna, State Medical and Technical Examination (SMATE) neih ṭhin chu Supreme Court thupek angin kumin aṭang chuan National Eligibility Entrance Test (NEET) hmanga tih vek a ni a; Mizoramah pawh India ram pum rualin NEET hi May 7, 2017 khan exam niin, Mizo zirlai 1,200 velin an hma­chhawn a ni.

Hetih lai hian, Bache­lor of Veterinary Science (B.V.Sc.), Ayurvedic, Ho­moeopathy, B. Pharm, B.Sc (Agri), B.Sc. (Nur­sing) leh course dang zir turte tan State Medical and Technical Examination (SMATE) buatsaih tho a ngai a; SMATE hi June 8-9 chhungin buatsaih a ni ang.

Mizoram chuan engi­neering course hrang hrang atan sorkar laipui aṭangin seat 121 a nei a, a zir turte chu Joint Entrance Examination (JEE) hmanga thlan a ni ang.

JEE hi April 2, 2017 khan buatsaih a ni tawh a, result pawh April 27-ah tihchhuah a ni tawh. Tribal candidate-te zinga ṭhenkhat, Indian Institute of Technology (IIT)-a an luh theih nan May 21 khan a hranpain entrance test buatsaih leh a ni bawk.

Mizoram quota-a engi­neering course zir turte chuan June 14, 2017 thleng, HTE Techni­cal Wing office, Chaltlangaah JEE-a an mark hmuh tarlanna score card thehluh tur a ni a, an mark hmuh san dan indawt chu June 19-23 chhung tar chhuah a ni ang a, July 7 aṭangin seat thlan ṭan theih a ni ang.

HTE Technical Wing hotute chuan, engineering line-a Mizoramin quota a neih chu a tam tham deuh avangin Mizo zirlai ringawtin an hnawh­khat zo ngai lo a, zirlaite tan seat chan loh a awm meuh lo tih an sawi.

Supreme Court chuan nikum khan thupek thar tichhuakin, state sorkarin technical course zir tur thlanna atana exam an buatsaiha tlingte'n MBBS leh BDS an thlang thei tawh dawn lo tih a puang a, MBBS leh BDS zir turte chuan NEET an paltlang a ngai tawh a ni.

SC thupek hi state ṭhenkhatin an khin avangin nikum khan hman a ni lo a, kumin aṭangin hman a ni dawn ta a ni.