Truck driver-te'n hrethiam turin an ngen

Mizoram University Stu­dents Council (MZUSC) chuan vawiin aṭangin FCI Ku­dam, Tanhril chhehvela kawng­pui sira kawngpui tichep zawnga truck dingte chinfel hna thawh ṭan an tum. Hemi chungchangah hian Mizoram Truck Drivers Asso­ciation (MTDA) chuan thuchhuah siamin, an dinhmun hrethiam hrâm turin an ngen.

MDTA chuan, Mizoram buhfai mamawhte chu Tanhrila FCI Kudam aṭanga pek chhuah deuh vek niin, buhfai release order awm lai chuan ni khatah truck phur tam tak pek chhuah ṭhin a ni a, chutih laiin, kudam leh a chhehvelah AMC, Trafic Police leh local council-te'n truck 12 chiah lenna tur parking an rín niin an sawi.

FCI kudam aṭanga buh­fai phurh chhuah chu truck 12 vel chauh phurh sên a ni lo tih sawiin MTDA chuan, "Kan motor-te hi hmun dang parking-ah leh Ch.Chhunga Truck Terminal-ahte dah ni ta se, kudam leh a chheh­vela truck 12 vel awm sate'n an load zawha load la nghal turin khawpui chhung no entry-in min dang nilêng leh si a. Khawi emaw zau lai deuha motor kan dah loh theih loh vanga kawng duhthusama zau tâwk ṭhin lote hi MTDA chuan pawi a ti hle a ni," an ti.

MTDA chuan, an din­hmun hria a, buhfai phur tur truck-te vanga harsatna tuartu veng mipui leh kawng hmangtute chu hrethiam hram hram turin an ngen a; anni pawhin Tanhrila FCI Kudam chu hmun dang remchang zawka sawn hun an nghakhlel hle tih an sawi.

MTDA press release-ah hian an president Lal­ramluaha leh general sec­retary Lal­hmudika Tochhawng-te hming tarlan a ni.