KHAWTHLIR

Mass casual leave la dawn
Mizoram Health Multipurpose Service Association (MHMSA) chuan, an recruitment rules siamṭhat an phûtna tihhlawhtlin a nih loh vanga lungawi lohna lantir nan, vawiin aṭangin tun kar chhung zawng mass casual leave an la dawn. MHMSA-te hian chawlhkar hnih chhung badge dum bel leh pen down strike an lo ti tawh a, an thil phût a hlawhtlin loh chuan June 5 aṭangin tiam chin awm loa chawlh an tum bawk a ni.

Thisen pe
May 27, Inrinni khan ṬKP Coordination, Aizawl huaihawtin Luangmual bial leh Zotlang bial ṬKP-te'n Aizawl Civil Hospital tan thisen unit 116 an pe a, YMA Mission Veng Branch-in YMA Day thleng tur pualin unit 31 an pe. Lairam Isua Krista Baptist Kohhran ṭhalai pawl, Lawngtlai AOC bialte'n Lawngtlai District Hospital tan unit 29 an pe a; Tuikhuahtlang Branch YMA-in YMA Day pual-in Synod Hospital tan unit 26 an pe bawk.

Khehpuam man
Mizoram police-a CID (Crime), Central YMA leh YMA sub-hqrs Kolasib Kumpuan Joint Operation-te chuan, Zirtawpni zan dar 11 khan Vairengte-ah pseudoephedrine (khehpuam) mum 5,28,000, kg. 55-a rit an man. Khehpuam an man hi Rs. 84,48,000 hû a ni a, a neitu an chhui zui mek a ni.