Chin Minister-te'n Saisihchhuah an tlawh

Lawngtlai district-a Saisihchhuaha India leh Myanmar insumdawn tawnna tur hmun siam mek chu, May 26, 2017 khan Myanmar-a Chin state minister pali leh sorkar officer eng emaw zatin an tlawh.

Sangau aṭanga thu dawn danin, Pang khaw bula Saisihchhuaha Indo-Myanmar border trade neihna tur hmun panna tur kawng chu Myanmar lamah chuan zau tâwk taka laih chhuah tawh a ni a; chu'ng kawng laihte chu Chin state minister-te leh sorkar official-te'n an en bakah, Chhimtuipui lui kânna tur lei dawhna hmun turte an en a ni.

Saisihchhuaha insumdawn tawnna tur hmun siam mek panna kawng hi Mizoram lamah pawh laih mek a ni a; Sangau aṭanga Páng khaw thlengin double lane-a laih niin, blacktop vek tawh a ni. Pang khua leh Saisih­chhuah inkar erawh chu laih zawh ni tawh mah se, blacktop zawh a la ni lo a; 407 truck leh a aia tê lirtheite chu an kal thei a ni.

Border trade hmun tur entu Chin state minister-te hi Roads & Communication changtu Suithio, Planning & Finance changtu Wikaw, Municipal, Electric & Industry changtu Salai Isaac Khin leh Chief Authority & Minister of Thantlang Township Thangchung te an ni.