Guwahati-ah Mizo zirlai pahnih thiin chhar

Guwahati-a lehkha zira awm C Lal­hmangaihsanga (26) s/o C Chawnghranga leh R Lalmalsawma (26) s/o Chhawnsanga (L), Lung­lei Electric Veng ve vete chu nimin zing khan thia chhar an ni a; an taksaah hliam a awm nual.

Thu dawn danin, Lalhmangaihsanga leh Lalmalsawma te hi Assam Downtown University-a technician zirlai an ni a; Lalhmangaihsanga hian Dyliasis zirin, Lalmalsawma'n Physiotherapy a zir thung.

Lunglei tlangval pahnihte ruang hmuhna hmun hi Panikanti-a rêl kawngah a ni a, Lal­hmangaihsanga hi a bán leh a ke ruh a tliak a, Lal­malsawma chu a beng aṭangin thi a chhuak bawk. An ruang hi police-in an buaipui hnuah, nimin chhun dar 1 vel khan GMC Hospital-ah enfiah (posmortem) a ni.

Lalhmangaihsanga leh Lalmalsawma te hi Guwahati Mizo Welfare Association-in an buaipui a; bialtu MLA Joseph Lalhimpuia chuan Lung­leia ruang thawn dan tur­ah leh pawi khawihtute man chhuah ngei an nih theih nan theihtawp chhuaha hmalak a nih tur thu a sawi.

Lunglei Electric Veng Branch YMA chuan nimin khan an member thite chungchangah emergency meeting an nei a; an tarlan danin, ruang hi zaninah Lunglei thlenpui beisei niin, naktuka vui tura ruahman a ni. Zirlaite ruang hi Assam Downtown University-a zirtirtu leh zirlai ṭhenkhatin zui an tum niin an tarlang.