Catch Them Young hi MNF sorkar tihchhuah liau liau - MNF Vice President
MNF vice president Dr R Lalthangliana chuan, football-a Mizoramin dinhmun sang tak a thleng ta chu MNF sorkar hmalakna vang niin a sawi a, "Catch Them Young pawh hi MNF sorkar tihchhuah liau liau a ni," a ti.
Dr R Lalthangliana hian May 27, Inrinnia Tlungvel BNRGSK Hall-ah Socio Economic Development Programme (SEDP) zirhona a hmanpuinaah thu sawiin, "Football-a Mizoram dinhmun sang taka kan awm ta hi a lawmawm tak zet a, hetiang kan nihna ṭobul hi MNF sorkar kha a ni. Kan sorkar lai khan SSA Football Academy-te dinin nasa taka hmalak a ni," a ti a; Catch Them Young pawh kum 2005-a MNF tihchhuah niin a sawi.
MNF Vice President chuan, Rajiv Gandhi Stadium sakna turin MNF sorkarin sum vaibelchhe tam tak an sawi chhuak nia sawiin, "Lal Thawnhawla Stadium an tih tâkte pawh hi MNF sorkar sum sawi chhuaha sak a ni," a ti a; infiamnaa ṭhalaite'n hma an sawn theihna turin MNF sorkarin hma a la nasa hle niin a sawi.
R Lalthangliana chuan, Congress sorkarah hmasawnna hna thawh a tlem hle nia sawiin, "MNF sorkar laia sikul tam tham tak kan upgrade bak kha tun sorkar hian engmah tih zui a nei lo hi a lungchhiatthlak. Hmun hrang hranga kawng kan laihte enkawl zuina tur pawh an nei lote hi a pawi hle a ni," a ti.