Kolasib MZP-in sorkar pisa dan tum

MZP headquarters, Kolasib chuan, Kolasib District Hospital-a surgeon, Dr Zothansanga Zadeng, Serchhip District Hospital-a awm tura tihna thupek (transfer order) chu May 31, 2017 ral hmaa sût turin sorkar an phût a; sut a nih loh chuan June 1-2 chhung Kolasib-a sorkar pisa zawng zawng khar an tum.

Kolasib MZP chuan thuchhuah siamin, tranfer order sût tura an ngen hnua sût a la ni lo chu pawi an tih thu an tarlang a, "May 31, 2017 hma ngeia sorkarin transfer order a sût loh chuan June 1 leh 2 hian damdawi-in, zirna sikul leh police tiam loin sorkar office zawng zawng khâr tum a ni a. Hemi hnu pawha transfer order sût a nih loh chuan na zawka hmalak tum a ni," an ti.

Kolasib MZP-te hian Dr Zothansanga Zadeng chu lên chilhin, Kolasib chhuahsan lo turin an ngen a; Kolasib a chhuahsan loh nan MZP office bearer-te'n a in bulah an veng ṭhin a ni.