HSLC leh HSSLC pass tharte chawimawi

Armed Veng Branch YMA chuan May 26, Zirtawpni zan khan kumina an veng aṭanga HSLC leh HSSLC pass-te lawmpuina leh chawimawina hun an buatsaih a; an Branch YMA adviser Z Dengthansanga'n kai-hruaiin, ZONET Cable TV director RK Lianzuala'n fuihna thu a sawi. Kuminah hian Armed Veng aṭangin HSLC pass mi 61 leh HSSLC pass mi 55 an awm a ni.

YMA Mission Veng Branch pawhin May 26 zan khan DYO Hall-ah Section Nite hmangin, kumina HSLC leh HSSLC pass tharte lawmpuina leh chawimawina hun an hmang a; Armed Veng South Branch YMA pawhin an veng community hall-ah Education Campaign buatsaihin, an veng aṭanga HSLC pass thar mi 68 leh HSSLC pass thar mi 42-te lawmpuina an hlan bawk.

Ramhlun North YMA pawhin May 26 zan vek khan, a venga RSC Field-ah HSLC leh HSSLC pass tharte lawmpuina hun an hmang a, Lalnghinglova Hmar, Vanglaini joint editor-in zirlaite fuihna thu a sawi.

Reiek Welfare leh Reiek MZP-te pawhin May 26 zan khan Reiek community hall-h an khuaa HSLC leh HSSLC pass tharte lawmpuina leh chawimawina hun an hmang a, parliamentary secretary (School Education) Joseph Lalhimpuia'n a hmanpui.