Industry neitute harsatna CM-ah thlen

Mizoram Industry Owners Association (MIOA) hruaitute chuan tun hnai khan chief minister Zoramthanga a pisaah an kâwm a; Mizorama industry hmasawn dan tur leh Covid-19 vanga industry neitute'n harsatna an tawhte an thlen.

MIOA hruaitute chuan chief minister hnenah hian industry din dawna power line pawh man hautak lutuk chungchang thlenin, sorkarin industry din tharte tana hamṭhatna a siam - State Incentive Subsidy (SIS) chu hripui léng kaihhnawihah harsatna lian tak an tawh avangin pe chhuak turin an ngen.

MIOA president F Rodingliana chuan, Industrial Growth Centre-a tui, power supply leh kawng chungchanga an harsatnate a hmuna kala enfiahpui turin an ngen a, ṭanpui theihna kawng a awm chuan puih a inhuam thu chief minister chuan a lo hrilh avangin an thlamuan thu a sawi. MIOA tarlan danin, SIS chungchangah hian CM chuan sum dinhmuh enfiah a, industry neitute chu SIS hnuaia ṭanpuina pek an tum tur thu a lo hrilh. SIS chungchang hi ziakin CM hnenah an lo thehlut tawh a ni.