Hmarchhak state-te nasa zawka Inthlunzawm a ṭul - CM Hawla

North East Council (NEC) Plenary Meeting chu nimin khan New Delhi-ah neih a ni a; chief minister Lal Thanhawla chuan thu sawiin, India hmarchhak state-te nasa zawka kawng hrang hranga thlunzawm a ṭul thu a sawi.

Chief Minister chuan, hmar­chhaka hmasawnna ṭhanmawhbâwk lian ber leh economic potential hai chhuahna kawnga dâltu lian ber chu inkalpawhna ṭha lo a nih thu a sawi a, "Hmarchhak state hrang hrangte hi nasa zawka kawng hrang hranga thlunzawm a ṭul. Tuna mamawh leh pawimawh ber chu kawng thar sial, a awmsate tihchangtlun leh thawm ṭhat a ni," a ti.

Ministry of DoNER leh NEC-te hnathawh leh tum chu thil thuhmun ni mah se, hmarchhak hmasawnna atan an thawh chin a inkalhthelh loh nan an thawh leh tih tur chiang taka en fel a ṭul thu sawiin CM Hawla chuan, "NEC meeting vawi 65-naa Prime Minister-in NEC kal zel dan tura hmathlir a neih kum khat a ral hnuah pawh thil tih tak tak a awm lo," a ti a; DoNER Minister leh NEC Chairman-te chu PM hmathlir tihlawhtling turin a ngen.

Lal Thanhawla chuan, NEC sum mamawh ang ruahmana pek a ṭul thu sawiin, "Sum pek chhuah a tlem avangin duh angin hmasawnna hna a chak thei lo. Kum thum atana cheng vbc. 7500 vel draft plan pharh hi NLCPR sum tling khawm aṭanga pek ni se, sum mamawh tunah pek dan anga pek chhunzawm a nih chuan regional plan hian awmzia a nei thui theiin ka ring lo," a ti.

Chief Minister chuan, NEC atana project siam theih a tlem lam, cheng nuai 1000-a bithliah chu ṭha a ti lo tih sawiin, "Hmarchhaka ramri dep, hmun kilkhawr leh hnufûmahte project tênaute'n pawimawhna leh

ṭangkaina an la nei viau a, chuvangin, project tlem lam bithliah ruahman chu kaltlangpui ṭha kan ti lo," a ti a; NEC sum pek aṭanga state huang chhunga priority project-te thlan chu state sorkar kut liau liaua dah a rawt.

Act East Policy chungchangah CM Hawla chuan, "Hei hian hmar­chhak state-te Asia chhim­chhak ram, ecomomy ṭhang mekte nena inthlunzawm a, sumdawnna hmanga hmarchhak tihhmasawn kawngah beiseina a pe a. Mahse, kum 20 a ral hnuah pawh hmarchhak bial economy-ah hmasawnna tih tham nghawng sawi tur a awm lo," a ti.

Lal Thanhawla chuan, Act East Policy ruahman leh kalpui zel danah hmarchhak state sorkarte chu ràwn ṭha a tih thu sawiin, "Policy a hlawhtlin nan hmarchhak aṭanga thil thawn chhuah theih zir chian te, ruhrel pawimawh siamte leh man man zawka thil siam leh deh chhuah kawng siamte a pawimawh," a ti. Myanmar nena ramria insumdawn tawnna chu khawtlang leh economy chawisan a nih theih nan dan anga kalpui a ṭul thu a sawi bawk.

Meeting hi DoNER minister Dr. Jitendra Singh-in kaihruaiin, hmarchhak state Chief Minister leh Governor hrang hrangte'n thu an sawi a ni.