Sum enkawl ṭha tawk loah CAG-in Mizoram sorkar a puh

Comptroller and Auditor General (CAG) of India chuan Mizoram sorkar chu sum enkawl ṭha tawk loah a ngai a, "NLUP hnuaia sum hman dan dik tak an tarlang lo," a ti.

CAG tarlan danin, NLUP hnuaiah Mizoram sorkar chuan kum 2011-2016 chhungin sorkar laipui aṭangin cheng vbc. 1526.14 a dawng a, chu'ng zinga vbc. 897.91 chu civil deposit (K-Deposit)-ah an dah a ni. Kum 2011-16 chhung hian NLUP line department-te chuan cheng vbc. 673.64 an la chhuak.

NLUP Implementing Board (NIB) chuan sum hmanna tur hmanhmawh thlak awm si loin an kawl turin thla tin cheng nuai 10 aṭanga nuai 164 inkar an lak chhuah ṭhin thu tarlangin CAG chuan, "Hetianga thil tih hi a dik lo a, sum tihchingpenna kawng a inhawng zau a ni," a ti.

NLUP sum chet vel dan­ah hian CAG chuan Mizo­ram sorkar chu sum enkawl thiam loah a ngai a ni.

CAG tarlan danin, NLUP sum hi sorkar laipuiin sanction guideline-a a tarlan dan chuan, project pawmpui (approve) a nihnaah chiah hman theih a ni. Chutih laiin, NIB Secretary ngenna angin NIB chuan zirlai 15-te Kokoro College, Japan-a zir tura tirhna atan cheng nuai 165 an pûktir a, pawisa hi September 2016 thleng khan rulh a la ni lo.

NLUP sum cheng nuai 646 chu a pung awm loin February 2011 aṭanga March 2014 chhung khan mi 30 hnenah pûktir a ni bawk. Agreement ang chuan, March-September 2017 chhunga rulh vek tur a ni a, an rul thei lo a nih chuan an LSC sorkarah an pe (surrender) tur a ni. Loan hi March 2016 thleng khan 18% chiah rulh a la ni.