KHAWTHLIR

Assam sorkarin chhui tur din
May 28, Pathianni zinga Guwahati-a thia chhar Mizo zirlai pahnih - C Lalhmangaihsanga (26) leh R Lalmalsawma (26), Lunglei Electric Veng thih chhan chhui turin Assam sorkar chuan high level inquiry committee a din dawn. Assam Chief Secretary chuan nimin khan Mizoram sorkar hnenah lehkhathawnin, principal secretary Ajay Tiwari kaihhruaina hnuaiah high level committee din a nih tur thu hi a tarlang a, "Thil tisualte dan angin hrem an ni ngei ang tih Assam sorkar chuan kan tiam," a ti.

Damdawi dawr Khâr a ni dawn
All India Organisation on Chemists & Gruggists (AIOCD) chuan vawiin hian India ram pumah lungawi lohna lantirin dawr an khar dawn a; Mizoram Chemists & Druggists Association pawhin an zawm ve dawn a, vawi-inah Mizoram pumah damdawi khar a ni ang.

Hall hawng
Siaha DRDA conference hall chu nimin khan Siaha DC Harleen Kaur-i'n a hawng. DC chuan, hall thar chu mipui leh sorkarin an ṭangkaipui ngei a beisei thu a sawi. Hall hi Rs. 5,00,000 sênga sak a ni a, mi 200 vel leng tura ruahman a ni.

Mau sawiho
Mizoram sorkar official, Ministry of DoNER, FIZ leh International Network for Bamboo and Rattan hotute chuan nimin khan PCCF conference hall-ah Mizoram mau tihchangtlun dan tur an sawiho.

La hmu lo
Pathianni tlai dar 3:15 vela Reiek kai, Tlawnga tla Lalawmpuia s/o Lalnunmawii, Durtlang Leitan chu zawn chhunzawm zel a ni a, nizana he thuziah lai thleng hian hmuh a la ni lo.