Guwahati-a thi zirlai 2 ruang a lo thleng HM Zira'n Assam HM hnenah lehkha a thawn

May 28, Pathianni zinga Guwahati-a thia chhar Mizo zirlai pahnih - C Lalhmangaihsanga (26) leh R Lalmalsawma (26), Lunglei Electric Veng ve vete chu nizan khan an in thlenpui a ni. Mi pahnihte hi tualthi nia ngaih a nih avangin, a thattute man chhuaha hrem an nih ngei theih nana hma la turin Home minister R Lalzirliana'n Assam Home Minister a ngen.

Tarlan tawh angin, C Lalhma-ngaihsanga s/o C Chawnghranga leh R Lalmalsawma s/o Chhawnsanga (L)-te hi Assam Downtown University-a Medical Laboratory Technology (MLT) zirlai an ni a, Lalhmangaihsanga'n Dyliasis zirin, Lalmalsawma'n Physiotherapy a zir. An taksaah hliam a awm nual a ni.

C Lalhmangaihsanga leh R Lalmalsawma te ruang hi nimin zing khan Mizoram luhpui niin, tlai dar 1:30 velah Aizawl thlenpui a ni. Mizoram luhpui an nih hnuah khaw hrang hrangah zirlai pawl leh pawl dangte'n an lo hmuak a, Aizawlah pawh MZP bultumin Vanapa Hall kawtah hmuah a ni a, an pualin inkhawm buatsaih a ni.

Zirlai pahnihte sûnna inkhawm­ah hian Lunglei Electric Veng bialtu MLA Joseph Lalhimpuia, parliamentary secretary chuan thu sawiin, C Lal-hmangaihsanga leh R Lalmalsawma te thihna chu Mizoram sorkarin pawi a ti tak zet tih a sawi a, "Kan Home Minister-in Assam sorkara Home MInister hnenah lehkha a thawn tawh a, kan zirlaite thihnaa mawhphurtute man chhuak a, an phû tâwka hrem a nih ngei theih nana hma la turin a ngen a ni," a ti.

MZP aiawha thu sawitu vice president B Vanlaltána chuan, an zirlaipui pahnihte tualthihna chu ná an ti tak zet tih sawiin, "Pawi khawihtute man chhuah a, an phu anga hrem an nih ngei kan phût a ni," a ti a; zirlai pahnihte thihna chu Mizote tipumkhattu ni se a duh thu te, North East Students Organisation (NESO) anga hma an lak dawn thu te, All Assam Students Union-te pawh hma la tura an ngen thute a sawi bawk.

Zirlai thite sûnna hunah hian pawl hrang hrangte'n puan leh pangpar an dah a, Central YMA leh pawl dang aiawhte pawhin thu an sawi a ni.

C Lalhmangaihsanga leh R Lalmalsawma te ruang hi Assam Downtown University-a zirlai ṭhenkhatin Lungleia an in thlengin an zui a, nizan khan an in thlenpui an ni a, Lunglei Electric Veng YMA, MZP leh pawl dangte'n Pukpuiah an lo hmuak. An pahnih hian vawiinah vui an ni ang.

Guwahati-a Mizo zirlai pa-hnih thite ruang hi phûm an nih hma chuan Mizorama hnam dang awmte chu an sahimna atan páwnchhuak lo turin MZP-in an chah a; hei vang hian nimin khan Aizawlah hnam dang (vai) hmuh tur an awm meuh lo a ni.