MHMSA member-te'n mass casual leave an la; An lungawi loh chhan Health dept.-in an sawifiah

Health department chuan thuchhuah siamin, Mizoram Health Multipurpose Services Association (MHMSA) member-te'n sorkar laka lung-awi lohna lantira nawrh an huaihawt mek chhan, an thil phût chungchang a sawifiah. MHMSA hian nimin aṭang khan mass casual leave an la ṭan.

Health department tarlan danin, health worker aṭanga health supervisor-a kai sân danah 75% chu seniority-a kai san ni se, a bak 25% chu limited departmental exam (LDE)-a a tiṭha apiangte kai ni se tih 2011 Recruitment Rules-a awm chu a ṭha tawkin sorkarin a hria a; hei hi a thawkte zingah inelna thianghlim a awm theihna tura duan a ni.

MHMSA-in LDE 25% an duh lo a, seniority promotion 100% ni se an tih chungchangah, "He ti a nih chuan mi thiam leh thluak ṭha, taima bawk si tan phûrna (incentive) a tlahniam ang tih department chuan a hlau a ni," a ti.

Health supervisor aṭanga community health officer (CHO)-a kaisan chungchang pawh MHMSA-in 100% seniority promotion ni se an duh. Tuna RR hman mekah chuan, 25% seniority promotion, 50% LDE leh 25% direct recruitment-te a ni a; LDE-a promo-tion 50% chu 25%-a tihhniam a, seniority 25% chu 50%-a tihsan ve thung turin department-in rawtna a siam a ni.

Rawtna hi DPAR (GSW) chuan ṭha tawk-a hriain, Law & Judicial department-in a ṭul anga hma an lo lak tura thawn mek a ni a, chu chu a hlawhtlin chuan seniority-a kaisanna 25% chu 50%-ah a kai chho dawn tihna a ni tih sawiin, Health department thu-chhuah chuan, "Tun dinhmunah a ṭha tawk rihin department chuan a ngai a ni," a ti.

Health department thuchhuah chuan MHMSA member chu pawh an nawrhnate titawp a, an hna zawm thuai turin sorkarin a duh tih a tarlang bawk.

MHMSA hian an thil phût tihhlawhtlin phûtin nimin aṭang khan chawlh (mass casual leave) an la ṭan. An ruahman dan chuan, mass casual leave hi June 2, 2017 thleng an kalpui phawt dawn a, an thil phut tihhlawhtlin a la nih loh chuan June 5 aṭangin tiam chin awm loa chawlh an tum. Mass casual leave an lak hma hian kawng hrang hrangin lungawi lohna an lo lantir tawh a ni.