Guwahati-a Mizo zirlai pahnih thihna Pawl hrang hrangin pawi an ti

Mizorama political party-te chuan thuchhuah siamin, Assam Downtown University-a zirlai pahnih - R Lalmalsawma leh C Lalhmangaihsanga te thia chhar an ni leh, mi kut tuar ngei nia lang chu an dem thu an tarlang a; pawi khawihtute mana hrem ngei an phût thu an sawi.

MNF chuan, Mizo zirlai pahnihte chu thinlung takin an sún a, pawi an tih tak zet thu leh an chhungte an tawrh-pui thu an sawi a, "Pawi khawihtute man chhuak thuai a, a na thei ang bera hremna pe turin Assam sorkar kan phût a, zirlai pahnih chhungte zangna-dawmna pe turin Assam sorkar kan phut tlat bawk," an ti.

MPC party pawhin an pawi an tih thu te, an lainat thu te, pawi khawihtute an dem thute an tarlang a, "Mizoram sorkar pawh a khua leh tuite thlavâng hauhna leh tualthattute man chhuak ngei tura na taka Assam sorkar nawr ngei turin kan phût a ni," an ti a; vanduaina tawk chhungte hnenah zangnadawmna pe turin Assam sorkar an phût tih an sawi bawk.

ZNP ṭhalai chuan, zirlai pahnihte chu mi kut tuara thi ngei nia an ngaih thu sawiin, an chhungte an tawrhpui tak zet thu an sawi a; an thih dan chhui chhuah ngei a nih theih nan leh mawhphurtute dan anga hrem an nih theih nan inrawlha hma la turin Assam CM Sarbananda Sonowal an ngen niin an tarlang.

National Stundent Union of India (NSUI) Mizoram, NSUI district hqrs. Lunglei leh Lunglei District Congress Committee chuan, C Lalhmangaihsanga leh R Lalmalsawma te tualthihna pawi an ti tak zet thu leh an chhungte Pathian-in awmpui se an duh thu an sawi a, "He thihna chungchanga thil awm dan dik tak chhui chhuak turin Assam police-te kan phut tlat a, pawi khawihtute chung-ah an phût tawk hremna lekkawh ngei ni rawh se," an ti.