Mipui dâwm kânna tur ni lêm lo hnate chawlhsan rih ni se - Congress party

Mizoram Pradesh Congress Committee (MPCC) Media department hotute chuan nimin khan Aizawl Press Club-ah thuthar thehdarhtute an kâwm a; mipui dinhmun dâwm kânna tur ni lêm lo hnate chu chawlhsan rih ni se an duh thu an puang.

MPCC Media chairman Dr Lallianchhunga chuan, Congress party chuan Mizoram hmasawnna an duh thu sawiin, "Mizoram hmasawnna ruhrel lian leh pawimawh zawng zawng deuh thaw hi Congress sorkar laia siam a ni rêng a ni. Amaherawhchu, Covid-19 vanga eizawnna chán ta leh tâlbuai tam takte hi sorkarin tun dinhmunah chuan ngaihtuah phawt se kan duh," a ti.

Covid-19 vangin mipuiin harsatna nasa tak an tâwk tih sawiin Lallianchhunga chuan, "Sorkar hnathawk hlawh pûk ṭhensak ngaia kan awm lai hi chuan mipui dinhmun dâwm kânna tur ni lêm lo leh hna hmanhmawhthlak loh, infiamna lam thil leh a dangte hi chawlhsan rih ni se kan duh mai a ni," a ti a; India ramah sorkar hnathawkte hlawh pe kim thei lo state tlemtê chauh an awm a, state ṭhenkhat chuan an rulh tawh thu a sawi.

MPCC Media Chairman chuan, MNF sorkarin state chhung aṭangin revenue a hmuh ṭhat thu sawiin, "Finance department-in Lalrindika Ralte, MLA zawhna a chhànnaa a lan danin, kumin April leh May-ah tax leh non-tax aṭangin cheng nuai 12,387.13 hmuh a ni a, nikum April leh May-a hmuh aiin nuai 1769.02 zetin a tam zawk. Sorkar laipui aṭanga sum hmuh pawh a tam hle a ni," a ti.

Kum 2020-21 budget hman a la nih mang loh thu Chief Minister-in a sawi tih sawiin Lallianchhunga chuan, "Hetiang a nih avang hian MNF sorkar hi sum leh paia harsa viau tur a ni lo," a ti a; Covid-19 do nana sum a hautak tawh bawk si loh avangin June aṭanga thla thum chhunga sorkar hnathawk hlawh cheng vbc. 90 an pûk tur chu eng atana hman tur nge tih puang turin sorkar an phût tih a sawi. 

Dr Lallian­chhunga chuan, CM Zoramthanga'n July 14, 2020-a TV-a thuchah a sawiah, Mizoram State Sports Council (MSSC) hnuaia contract tam tak pek chhuah chungchang a sawifiah bakah, budget chungchang a sawi tih tarlangin, "Sorkar hi dan hrang hrang hmanga kal a nih avangin CM leh Finance Minister tan pawh chu'ng dante chu hriat kim vek sên a ni lo," a ti.

MPCC Media Chairman chuan, CM-in MSSC hnuaia hna pekte tihdanglam theih tawh lo anga a sawi chu thu dik a ni lo tih sawiin, "Dan hmangin CM leh Finance department-in an tihdang­lam theih a awm," a ti a; hemi chung­changah hian thil dik tâwk lo ti an awm em ni tih chu an zawhna a ni tih a sawi.

MPCC Media-te sawi danin, CM Zoramthanga'n, supplementary demand chu budget siam vek tawh hnua budget-a lang lo, central aṭanga sum hmuh - CSS, etc. te ziah felna a ni tiin a sawi. Amaherawhchu, Supplementary Demand for Grants-ah CSS aṭanga sum lo kal chiah siam rem a ni ngai lo a, state plan chhunga sum hman dan tihdanglamte pawh a lang tel ṭhin.

Assembly session-a CM-in zawhna a chhàn danin, kum 2018-19 chhung atana NEDP-a sum dah nuai 7100 chu a tìra ruahmanna ni lo, thil dangah MNF sorkarin an hmang a ni. CM-in tun hnaia MSSC hnuaia hna pekte a sawifiahnaah, sorkar laipui aṭanga a hmanna tur awm sa veka sum hmuh a nih thu a sawi tih tarlangin Dr Lal­lianchhunga chuan, "July 2, 2020-a MPCC-in a tarlan tawh, MSSC hnuaia work order pek chhuah cheng nuai 825 zinga a zatve aia tam, cheng nuai 479 kha SEDP hnuaia mi a ni," a ti.

MPCC Media tarlan danin, cheng nuai 195 senna tur, Serchhip Leisekawt Field siamna (cutting of hillock and construction of counterfort retaining wall) atana work order tih­chhuah pawh Assembly session-a zawhna leh chhanna aṭang chuan SEDP sum a ni a; North Vanlaiphai football field-a pavillion sakna sum nuai 47.61 pawh SEDP sum a ni bawk.