Mizoram sorkarin Bru-te thil ngiat A ngaihtuah thei lo - CM Hawla
Chief minister Lal Thanhawla chuan nimin khan Union Home minister Rajnath Singh chu New Delhi-a a pisaah a kâwm a; tun hnaia Bru-te thil ngiat chu Mizoram sorkarin a ngaihtuah theih loh thu a hrilh.
Chief Minister chuan, kum 1997-a buaina a chhuah hnuah, khatih laia Bru-te chu Mizoram chhuahsan lo turin a ngen tih sawiin, "Ṭum tam tak Tripura refugee camp-a awm Mizoram Bru-te hi la let turin road map-te siamin ruahmanna siam a ni a, chhungkaw tam tak chu an lo kir tawh," a ti a; Bru tam zawk chuan ruahmanna siam tawh sate pawm loin thil thar leh demand an neih belh zel thu a sawi.
Tun hnaia Bru-te'n intihhmingchhiatna leh Mizote an puhnate chungchangah Lal Thanhawla chuan, "Mizoram sorkar chuan Mizoram Bru dik takte chu Mizorama an kîr leh ngei a duh a, mahse, refugee camp-a awm Bru hruaitu ṭhenkhat kawhmawh báwl, anmahni hmasialt'en lo kîr duhte an vau ṭhin," a ti.
CM Hawla chuan, tun hnaia Bru-te thil ngiat tharte chu Mizoram sorkain a ngaihtuah thei lo tih sawiin, chu'ngte chu sorkar laipuiin a pawm dawn a nih chuan, Mizorama Bru lo kir tawh chhungkuate pawh a pe ve tur a nih thu Union Home Minister a hrilh a ni.
Lal Thanhawla chuan, police tihchangtlunna, Modernization of Police Forces chungchang sawiin, "Police-te chenna-in tam tak chu a ṭhat tawh loh avangin Special Police Housing ngaih pawimawh a ngai. Mizoram hi ram pahnihin a kárcheh avangin venhimna hi ngaituah bik a ṭul a ni," a ti.
Ramri depah Assam Rifles leh Border Security Force-te nen Mizoram police-te'n thawhhona ṭha tak neiin hna an thawk mek tih sawiin Chief Minister Hawla chuan, "Hetih lai hian, Mizoram police lamin border police outpost mamawh zat ang an neih loh avangin harsatna an tawk fo ṭhin," a ti a; border police outpost siam belh ngaih pawimawhsak turin Home Minister a ngen a ni.