Thanzara'n Mizoram mamawh thlen
Health minister Lal Thanzara chu nimin khan Guwahati-a India hmarchhak state-a health minister-te intawh khawmna, 1st. Conclave of Health Ministers of North Eastern States-ah telin thu a sawi a; hriselna lama hmalakna atana Mizoram mamawh hrang hrangte a sawi.
Conclave hi Ministry of DonER, North Eastern Council (NEC) leh Assam sorkara Health & Family Welfare department-te huaihawt a ni a; hmarchhak state-a health minister hrang hrangte'n an state chhunga hriselna kawnga hmalaknaa ṭul leh mamawhte thlenin, an sawiho a ni.
Minister Lal Thanzara chuan, Aizawl Civil Hospital-ah MRI dah a nih theihna tur te, Mizoram State Cancer Institute, Zemabawka blood bank dinna turte leh Synod Hospital Nursing School main building sakna tur sumte a rang lama pe chhuak turin a ngen.
Lal Thanzara chuan, Mizoram chu cancer vei tamna state a nih avangin khum 100 awm theihna Tertiary Cancer Care Centre siam mek a nih thu a sawi a; District Hospital pathum - Mamit, Kolasib leh Lawngtlaite chu khum 100 awm theihna tura tihlen a ṭul thu a thlen.
11th. Five Year Plan chhunga sorkar laipuia Health & Family Welfare ministry sum hmanga sak GNM school pali leh ANM school pathumte chu peih ṭep a ni tawh tih a sawi a; thil man sang zelah approve cost-in project pumpui a daih loh avangin tihpuitlinna leh a taka kalpui theihna atan cheng vbc. 12.75 pek belh turin NEC a dil belh a ni.
Lal Thanzara chuan, hriselna kawnga Mizoram mamawh hrang hrang tihhlawhtlinna kawnga theihtawp chhuahsak ṭhintu DoNER minister Jitendra Singh leh NEC secretary Ram Muivah-te chungah lawmthu a sawi bawk.
Health minister Lal Thanzara hi Hospital & Medical Education director Dr T Lalhmangaihi'n a ṭawiawm a ni.