Covid-19 vei mi 29 hmuh belh a ni
July 15, Nilainia Zoram Medical College (ZMC) leh Lunglei Civil Hospital (LCH)-a swab sample endikah Covid-19 hripui vei mi 29 hmuh chhuah a ni. Mi 29 zinga pasarih chu tun hnaia state pawn aṭanga rawn lut ni lo, Mizorama awm sa, hripui veite'n an kài chhàwn a nih thu sorkar thuchhuah chuan a tarlang. Mizorama Covid-19 vei hmuh tawh zat chu mi 267 an ni.
Nilainia ZMC Covid-19 laboratory-a swab sample 295 endik zingah Covid-19 vei mi 24 hmuh chhuah a ni a, mi 271 an fihlîm. Hripui vei hmuh tharte hi mipa 21 leh hmeichhia pathum, kum 3-64 inkar an ni. Harsatna neih vanga State Referral Hospital (ZMC)-a awm mek pakhat tih loh zawng chu quarantine facility-a awm lai, symptom nei lo vek an nih thu sorkar thuchhuahin a tarlang.
Sorkar thuchhuah tarlan danin, ZMC-a hripui vei hmuh thar zinga 13 chu Assam Rifles mi leh sa niin, Zokhawsang, Aizawla AR quarantine facility-a awm mek an ni a; an zinga pakhat chu Mizorama awm sa, positive contact aṭanga kái a ni. Mi pakhat chu National Disaster Response Force (NDRF)-a mi sipai kum 27, a taksaah harsatna (symptom) a neih vanga SRH-ZMC-a awm mek a ni a; ani pawh hi Mizorama awm sa, Mizoram chhunga mi dangin an kài chhàwn a ni.
ZMC-a Covid-19 vei hmuh thar mi 24 zinga pariat - mipa pasarih leh hmeichhia pakhat chu Lawngtlai district-a mi, tun hnaia Assam leh Bihar aṭanga rawn haw an ni a; pakhat chu Mamit district-a mi hmeichhe naupang kum 3 mi niin, tun hnaia Arunachal Pradesh aṭanga lo haw a ni. July 15-a ZMC laboratory-a swab sample endik zat chu - SRH-ZMC-a awm sa mi pahnih bakah, Aizawl aṭangin mi 156, Lawngtlai aṭangin mi 44 leh Mamit aṭangin mi 93 a ni.
July 15, Nilaini vek khan LCH laboratory-ah TrueNAT hmangin swab sample 26 endik a ni a, Covid-19 lakah mi 21 an fihlim laiin, mi pangain an vei tih an hmu chhuak. LCH laboratory-a hripui vei hmuh thar mi pangate hi Border Security Force (BSF) sipai, mipa kum 30-58 inkar, Lunglei bul Vanhnè-a BSF camp-a awm lai vek an ni a; an vaiin Mizoram chhunga mi dang aṭanga kai vek an nih thu leh, tun dinhmunah symptom a lan loh thu sorkar thuchhuahin a tarlang. Heti hian, Nilainia Covid-19 vei hmuh chhuah mi 29 zinga Vanhne, Lungleia BSF sipai panga leh Aizawla Assam Rifles leh NDRF mi pakhat ve ve, an vaiin mi pasarih chu Mizoram chhunga hripui ve tawh sate
aṭanga kai (positive contact) an ni.