Vawiin World No Tobacco Day

Vawiin, May 31 hi World No Tobacco Day a ni a, Mizoramah pawh hman a ni dawn.

Vaihlo dona kawnga hma latu anti tobacco squad-te chuan kumin chhungin squad drive vawi 39 an nei tawh a, vaihlo aṭanga thil siam chhuah eng emaw zat an man tawh.

World No Tobacco Day hi World Health Organisation (WHO)-in a puan a ni a, kum 1987-ah hman ṭan a ni. Kumina Day thupui chu 'Vaihlo hi hmasawnna tiṭhan-ṭhutu a ni' (Tobacco – a threat to development) tih a ni.

May 31-a World No Tobacco Day den­chhen hian Mizoramah May thla chhungin No Tobacco Month hman a ni a; No Tobacco Month chhung hian district hrang hranga anti tobacco squad (ATS)-te chuan an district ṭheuhah special squad drive ṭum 39 an nei hman a ni.

No Tobacco Month chhung hian ATS-te chuan vaihlo zûk leh hmuam khuahkhirhna dan Cigarretes and Other Tobacco Pro­duct Act (COTPA), Legal Me­trology (Package Commodities Rules) 2011 leh Food Safety & Standards Act 2006 hmangin dan loa zawrh meizial (cigarette) packet 9,016 leh tlawn 21 bakah, churut tlâwn 138 an man a; Gutkha leh Pan Masala leh a kaihnawih Shikhaar leh S-10 packet 7,720 an man bawk.

No Tobacco Month chhung hian phal lohna hmuna mei zu mi pathum man niin, dan angin pawisa chawitir an ni a; COTPA Section 6(a), kum 18 hnuai lam hnena vaihlo kaihhnawih zawrh khap a nih thu tarlanna (signage) tár lo dawrkai 18 man niin, pawisa chawitir an ni.

Tualchhunga siam (local toba­cco product) chi hrang hrang tuibûr, zozial leh sahdahte pawh uluk taka endik ṭhin a ni a, a siamna (factory)-te tlawh a ni.

Special squad drive neih chhungin Aizawla New Market-a vaihlo aṭanga tualchhunga siam chi hrang hrang zuartute chuan danin a phût angin an thil zawrhah vaukhanna thu leh a lem (pictorial health warning) an târ kim tawh nia thu dawn a ni.

Hetih lai hian, Aizawl district ATS, Legal Metrology enforcement leh Bawngkawn police-te chuan May 28, Pathianni khan Selingah Myanmar lam aṭanga lak luh meizial, Dunhill báwm 1,000 an man a, a neitu Vanchhuma, Tahan, Myanmar an man tel. Dunhill hi a siamtu company hming leh address leh a man zat ziah lan a nih loh vang leh pictorial health warning a awm loh vanga man a ni.

Zûk leh hmuam chi hrang hrang, ram páwn aṭanga lak luh leh tualchhunga siamahte COTPA Section 7-in a phût angin, vau­khanna thu leh a lem (pictorial health warning) 85% awh a intar tur a ni a; Legal Metrology danin a phût (declaration) angin, a man zat, a siamtu leh la luttu hming leh address-te tarlan tur a ni bawk.