Thli tlehin tihchhiat lian tham a nei lo
Nimin khan Mizoram hmun hrang hrangah Cyclone Mora avangin thli a tleh a, Siaha district-ah thawk na ber mah se, thil tihchhiat lian tham a neih hriat a ni lo.
Siaha aṭanga thu dawn danin, Siaha district-ah hian thli tleh hian in eng emaw zat chung a la a, telephone ban ṭhenkhat a tihtluk bakah, hmun eng emaw zatah electric hrui a chat.
Siaha District Hospital atana hman lailâwk medical quarters chu a him tawk loa ngaih a nih avangin damlote sawn chhuah lâwk an ni a, mahse, medical quarters pawh hi thliin a tichhe lo. Chawhma dar 9:30 vel khan thli a tleh ṭan a, tlai dar 2:30 velah a reh a ni.
District hrang hrangah pawh thli hi a tleh a, in chung lak leh thing tlute awm nual mah se, thil tihchhiat lian tham a neih hriat a ni lo. Serchhip district-a Lungchhuan khuaah chuan in pakhat a chhia a, Mualvumah thing tluin motor pakhat a delh chhe bawk.
Mizoram sorkar chuan Thawhṭanni khan thuchhuah siamin, National Disaster Management Authority (NDMA) aṭanga Mizoram Disaster Management Authority (MDMA) leh DMR Secretariat thu dawn danin, Mizoram chu cyclone 'Mora' in a nuai thut thei tih a tarlang a, fimkhur turin mipui a hriattir a ni.